2013年6月13日,星期四 (晚上)
白浜天氣
由ADVENTURE WORLD返到酒店就去超市買晚餐,酒店附近有間DAISO,又有超市
訂酒店房間時可以揀一泊兩食,都只係每人8400YEN
不過白加煎同友人就揀左宿一宵+朝食,價錢係每人6500YEN
唔留响酒店食自助晚餐係因為唔想俾食飯時間限住其他活動
況且白加煎愛上了"可樂餅",超市就買到,所以選擇超市嘅晚餐
晴朗嘅黃昏下,對遊客黎講响白浜嘅指定動作一定有"円月島"
返到酒店攞返行李就上房放底啲晚餐
酒店嗰個識啲英文嘅大叔指示左如何行去石堤睇円月島
其實只係酒店行出去大約一分鐘就到石堤
大叔仲响酒店大門毛巾柜上攞左兩條小毛巾俾白加煎同友人
條毛巾用黎做咩呢?
哩次出發前,和歌山有颱風危機,好彩最後個颱風都識趣急轉彎
如果真係"哇~哇~哇,打到黎,白浜哩度食正風,可以幻想一下情況會有幾嚇人
黎到哩度,石堤上堆左20人左右,9成係香港人
人人都等太陽會爬入哩個石洞入面
不過等等下就知道睇唔到哩個美景,因為水平線上有一大層厚雲
太陽伯伯只可以响雲層銀幕中謝幕
太陽さん、お疲れさまでした
雖然睇唔到太陽爬落石洞入面,但円月島哩個日落景色真係幾迷人
網上圖片: 如果好運氣嘅話,會見到太陽伯伯跌落哩個洞入面
不過即使運氣欠少少,但晴天+夕陽嘅円月島都唔係輸蝕好多
哩次第一次帶住新相機去日本,的確係英雄有用武之地
石堤旁邊有足湯,大叔攞俾白加煎嘅毛巾就係供足湯之用
不過白加煎無浸,30度高温浸足湯咪只會熱上加熱,唔怕會蝕底,只怕會熱"屎"
返酒店前先去左LAWSON辦啲緊要事
用自動Loppi搞掂買電話咭,同確認出發前响網上預訂左嘅高速巴士車票
哩次係白加煎第二次用LAWSON便利店嘅自動Loppi
連自知有"機器不耐煩症"嘅白加煎都輕易搞掂Loppi
叫友人參予試做,不過友人就顯得無心向學,都係嘅~友人同老公本來係自駕遊一族
大概唔會再有機會坐高速巴士遊日本
如何使用Loppi買車票?
高速巴士網頁有貼心+詳細嘅指示 http://www.j-bus.co.jp/web/haraou/loppi.html
攞住Loppi 嘅單據去收銀處俾錢,咁就出正式車票
哩次白加煎仲識得自己用Loppi買國際電話咭(以前係叫啲職員代勞)
白加煎又真係連手機漫遊都可免則免,繼續用比較平嘅國際電話咭向家人報平安
响便利店買嘅電話咭唔係咭,係一張紙,上面印有使用方法同密碼
夏天去到日本,便利店同超市都有花火出售,黎到白良浜點都要玩花火
白良浜入黑後,海灘差唔多係丁點光都無,完全係摸黑咁走入海灘
本來都有啲驚,會唔會有賊或者變態人架?
以下相片係將相機調教到拍攝夜景先拍到嘅照片,現場差唔多係伸手不見五指
企左一陣就聽到有人嘅笑聲,講野聲,其實附近都有啲人黎玩花火
一個意外嘅收獲: 無光害嘅地方,抬頭會睇到滿天星星
雖然星星嘅光唔太強,但留心睇下都見到滿天星星
友人唔係第一次玩,所以顯得興趣只屬一般 
玩到一半已經自動棄權
叫白加煎自己玩埋去
哩次旅行白加煎發現友人响難得"無枉管"嘅情況下原來可以相當率性
有時太率性會令人地唔好受 (率性可以變為亂龍)
哩啲情況下,就算白加煎玩得再開心,都唔想阻左友人返酒店休息
盡快燒完啲花火就走
玩到一半已經自動棄權叫白加煎自己玩埋去
哩次旅行白加煎發現友人响難得"無枉管"嘅情況下原來可以相當率性
有時太率性會令人地唔好受 (率性可以變為亂龍)
哩啲情況下,就算白加煎玩得再開心,都唔想阻左友人返酒店休息
盡快燒完啲花火就走
每次出門旅行都會响旅行入面體會到一啲事情
白加煎甚至認為旅行係漫長人生嘅縮影
如果想旅途可以盡興,咁就要小心選擇結伴同行嘅人
如果大家體力,意向,習慣都有明顯分歧嘅話,咁就可能已經唔係一個良伴
晚上相當寧靜, 白加煎鐘意左哩個非假日嘅白浜
白浜有別於白加煎以前去嘅山區田間
沒有留言:
張貼留言