
2013年6月13日,星期四 (零晨) 香港天氣
"落土"使用嘅機場,無論係香港,大阪都係用第二客運大樓
香港由第一客運大樓去第二客運大樓都好容易,只需徒步
但大阪關西機場就要坐免費接駁巴士

白加煎都係第一次由香港機場第二客運大樓出境
裝修唔及第一客運大樓咁華麗,不過都五臟俱全


CHECK-IN時响香港哩邊仲係去柜位由職員辦理

好奇怪登機証上面無指明邊個閘口上機,要自己去求証
用二號客運大樓過香港海關出境,從未試過咁暢通
咁當時又係坐零晨機,當然仲少乘客啦!

之後坐無人駕駛列車返去一號客運大樓等上機

登機閘口係34,哩次係白加煎第三次坐零晨機去日本

"落土"所用飛機似足白加煎响日本坐內陸機嘅SIZE
相比之下,停泊响附近嘅"全日吉"當堂覺得"全日吉"好有型


原訂00:35起飛,到埗關西機場係早上5點幾
其實由香港飛大阪,大約需時3.5小時,計埋時差1小時,00:35起飛,去到大阪仲係好好好早
所以飛機延遲左大半個鐘先起飛,反正有大把時間

"落土"嘅空姐比唔上"全日吉"嘅空姐專業,所講唔只係外表
一度令白加煎懷疑唔通佢地唔係派遣員性質?

哩次坐"落土"就睇到以前坐"全日吉"唔會發生嘅"奇事"
其實係咪"落土"航機上D乘客有行為傳染病?

D人好似人做我唔做就周身唔安樂咁,結果係"你衰我都衰"
坐過飛機嘅人都知道,手提袋一係放上面行李柜,一係放前面乘客櫈底
當晚坐白加煎附近嘅乘客,有好幾個都係用手攬住個手袋放响膝頭
最初空姐都有叫D乘客放返正確位置,但有幾個乘客無跟從

總之飛機起飛時,哩D人係攬住個手袋响膝頭
到底哩D乘客係無常識?係唔識英文?係蠢到唔明空姐D身體語言?還是自私?

廉航不設電視俾乘客消磨時間
宜家D人就用智能手機黎打發時間用數碼產品只可以係飛機安全行駛下使用
即係容許乘客無需使用安全帶之時,咁就為之安全行駛下
不過白加煎就見到有D人連飛機升緊或者準備降落緊都繼續公然咁沉迷智能電話
到底哩D乘客係無常識?係唔識英文?係蠢到唔明空姐D身體語言?還是自私?
可能佢地想一嘗坐飛機遇空難嘅驚慄感覺,不過為乜要叫埋其餘200人陪瘋陪葬呢?

當香港人批評強國人唔守規律乞人憎時,不如諗下自己有無做過D咁乞人憎唔合作嘅事?
真係放個手提抱响前面櫈底會死咩?

真係用少一陣智能手機會死咩? 真係等一陣會死咩?
飛機航行中,乘客使用手提電話或者電子產品係咪真係無乜嚴重影响?
咁就睇下報紙點講
到左落機時又見到有D乘客令人詑異
一般飛機係先俾頭等乘客先落機,其次係商務位乘客
不過當廉航無分頭等,商務座位,差唔多係人人平等之時,有D港人又盡顯強國人本色

飛機一停低,全部乘客有次序咁攞緊自己放响行李柜入面D行李
走廊已經擠滿人,有人當舉重咁高舉自己件有轆嘅小型行李然後強行响最後面穿過前面20幾行乘客,務求第一時間落機
哩D情景都幾新鮮
睇相都見到條走廊係好窄,仲咁樣打人尖只可以話,有D人本來就係哩副德性,只要有機會發揮時,佢地會盡顯真面目
有強國人墊底時,佢地扮自己高級,無強國人墊底時,即時真性情盡露

哩次坐"廉航"就預左乜都次等D
座位無咁闊落,連白加煎唔係高個子嘅女仕都覺得座位有D迫,難為了嗰D比較高個子嘅男乘客
飛機餐預左無,不過竟然連毛毡都無
零晨機預左好難入睡,無毛毡就有D凍,座位有D迫,結果眼光光咁過左3.5小時
日本時間未夠5點偷偷望到前面隻窗有破曉美景
响高空上平LEVEL望,同地上向天望係唔一樣

用關西機場第二客運大樓,乘客响停機坪上步入大樓,真係有D落後
以下係回程時所影嘅照片,同樣係踏上停機坪上機,真係無乜幾可!

好快過左海關,出左機場就即時上接駁巴士返出去第一客運大樓

巴士車程大約8分鐘,宜家機場設施嘅廣播除左有日文,英文,仲有普通話同韓文
普通話同韓文好似男新聞報導員D語氣咁
完全唔識韓文嘅白加煎,腦海突然出現肥仔恩個樣嘜頭
後記:
當白加煎响香港機場會合同行友人時,往積去到日本就會失去理智購物嘅友人
竟然拖住一個只係中型SIZE兼殘殘地嘅行李喼黎到
白加煎第一句說話係:你個喼咁細,裝到上限20KG野咩?!
友人當然認為無問題先帶佢上路啦!
而哩個喼响哩次旅行上都成為一個重要角色,佢仲會出場


沒有留言:
張貼留言