一個人浪盪日本2009-Day 8@札幌,函館(出發篇)

 

2009年9月19日,時晴時陰  仲有失魂雨

 

 

今日係要坐車去函館,不過唔係坐JR,而係坐"高速巴士"

 

以前未坐過新幹線時,就好想有機會一嚐新幹線既速度感

(註:北海道並無新幹線行走既)

以前未試過用JR全國PASS,就好想試下用

見識過後,就只係想"反樸歸真",做個精明消費者

尤其係宜家d日元兌換率咁高添!

所以呢次決定由札幌去函館,係坐高速巴士

 

格下價,睇下自己精明左幾多先~

坐JR既話,單程車票係8080 YEN,所需時間大約係3小時30分鐘

坐高速巴士既話,單程車票係4680 YEN,所需時間大約係5小時05分鐘

用多1小時35分鐘,慳到3400 YEN咁唔洗諗啦,一定係坐巴士

 

雖則响日本穿洲過省自由行過好幾次,但坐高速巴士都係第一次,之前無諗過高速巴士都會咁滿座

原來有咁多日本人既諗法係同我一樣咁"樸實"既~

 

結果我懶老定咁只係預早一日去買車票,又唔記得左9月21,22,23號係日本連續3日公眾假期

加埋之前既星期六,日,一共係"五日連休",其實由星期六起已經係日本人國內旅行既開始

結果想買白天既車票去函館,但一早已經賣晒,只係得返17:15同23:55呢兩個出發時間

咁唯有坐17:15呢班,預計到達函館JR站大約係22:20

 

呢一日突然要滯留响札幌多大半日,都唔知有咩好做,已經話札幌係"門+心(悶)"架啦,咁點打發時間好呢?

唯有shopping啦,結果去左Sapporo Factory度 hea!

Sapporo Factory既原址係釀酒廠,直到宜家都保留左釀酒廠既紅磚屋

 

雖然釀酒廠一早已經搬走左,但呢度仲設置左"札幌開拓市麥酒釀造所"

陳列札幌既啤酒文化,參觀免費,試飲要付款

 

呢一日,响廣場上仲有跳蚤市場

 

 

商場入面又有展覽睇,其中一個插畫師叫原田潤一,26歲

 

第一眼見佢d繪畫風格就已經好鍾意

  

 

  

唔知有無人同我一樣咁欣賞佢呢?

 

展覽館有佢d"大作",而佢本人就响跳蚤市場擺檔賣佢d"大作"

原田君見我對佢d"大作"咁愛不惜手,估到我係欣賞佢d才華,咁佢開始同我講野

不過,真係唔好意思喇,佢d日文講得太深,我唔多明白喎!

佢講野我就唔多明,但係下面幅插畫d文字,就幾有意思喇!

 

呢度係Sapporo Factory商場既內觀

 

 

呢日午飯時間揀去左McDonald,從來响日本都唔會幫趁呢d香港都有既食店

但今次為左呢個日本先食到既えびフィレオ(蝦包)

先會黎日本幫趁McDonald

 

(以下張相黎自日本McDonald既網頁)

 

咬落去,入面真係有原隻蝦肉,不過就無上面張相既咁大隻,同咁多

因為香港無呢個蝦包,所以呢個都算幾好味,至少有d驚喜啦!

 

不過比起"我的至愛情人函館さん"(函館先生)

嗰度有間漢堡包店仲"勁",係各樣野都勁呀!

(去到函館先再講佢點勁啦!)

 

 

食完午餐之後,

仲係對於買唔到"大鼻cake shop"-Z:cCOT既食物而心有不甘

既然仲有時間,自己又徘徊响愛恨之間,咁不如又再去睇下佢到鬧完情緒未?

肯開門做生意未?

結果...

咪係又運多盆吉囉!佢依然故我,死性不改!

我知佢係可以有生意唔做,有錢都唔賺,但可唔可以貼張"臨時閉店"既通告出黎

等d人客得個知字,咁係咪好d呀!

 

 

下晝四點幾,去左至愛之一既Mister Donut買埋晚餐响巴士度食

 

咁就返酒店攞返d行李出發去會情郎-函館さん

由"北大前"間東橫inn出發,推住行李都行左25分鐘,如果唔駛推行李,咁行15分鐘都到咯!

 

途中見到呢間天主教教堂

 

去到車站望下個"發車案內",我要响3號車站上車

 

呢架高速巴士既座位係3行單座位咁排列既,其實都幾舒服架

仲有公家電視睇

當晚就係睇住"志村動物園"既亞笨與亞占,等我打發時間既

五個鐘既車程比我想像中容易捱過

感覺上呢五個鐘頭車程好似快過坐飛機時既五個鐘喎!

 

札幌,bye-bye喇!希望後會無期喇!

我唔想仲有機會再返黎呢度呀!

呢次响札幌所經歷既種種事,下一篇就會講

 

北海道中央巴士網頁: http://www.chuo-bus.co.jp/highway/

 

 

就算上左車出發去函館,但其實呢日行程仲未完,意想唔到既事總係失驚無神就會發生架喇!

呢次去到函館又係會住東橫inn,訂房時以為自己會坐白天既高速巴士去函館

所以check-in時間我定左係20:00,終於因為買唔到白天既車票

而預計到達函館既時間係22:20

所以之前已經托札幌東橫inn既職員幫同函館嗰邊聯絡

將check-in時間改响23:00

 

如果過左check-in時間而客人仲未俾錢攞房,咁會自動取消訂房

但房租依然係100%照計,但唔會幫客人預留房間

 

我坐呢架巴士係"高速巴士"

但並唔係司機叔叔會高速咁駕駛,而只係因為佢行"高速公路"遮!

 

呢d長途巴士會中途停站休息,俾乘客去洗手間

或者去煲一陣煙 

個行程表明明話係只停站休息一次,但司機叔叔就前後停左兩次

再加上有d路段既街燈唔多,司機叔叔仲要小心d駕駛

結果預計係22:20到函館JR站前,搞到22:50先落車
一額汗咁仆住去酒店check-in,都只係啱啱趕到响22:57到酒店

 

一連5日既日本公眾假期,函館呢d地方又係觀光旅行既地方

d酒店點會唔full?!如果真係俾人執二攤咁執左我間房

咁到時幾貴既酒店都要俾錢住呀!

當時就嚇餐飽,但事後諗返呢d有驚無險野,又幾刺激架!

 

 

喂! もしもし, my friend,你set衡個頭

化好粧未呀?我帶埋你去會情郎-函館さん呀!