2009年9月17日,全日天晴 
第四站:富田農場
富田農場大概係富良野中,人氣最旺既薰衣草農場
因為位置近JR車站,而且80年代"人氣長壽日劇"曾响呢度取景
所以令富田農場既遊人不絕
呢個係富田農場既地圖
一入到農場第一個景就係呢度
見到一班"變色龍"嬸嬸
仲張張相都唔見佢地有抬高頭架喎 ~
咪係因為佢地唔記得連塊面都要變紫色咯
好鐘意呢張相 ~
其實响富良野d花場,由6月尾開始至10月,戶外既地方都可以睇薰衣草既
只係暑假嗰個時期,响d大既花場
會種好大面積地方既薰衣草,咁個場面咪壯觀好多囉!
薰衣草都有唔同品種既 ~
呢一枝係種响溫室既薰衣草
要响度用少少位黎讚下呢兩個日本人哥哥,尤其係左邊呢個"名古屋哥哥",右邊呢個係"怕醜哥哥"
佢地係同團既團友,可能佢地見我一個女仔咁"寂しい"(寂寞)
連自拍時都要用相機腳架
咁黎到富田農場之後,"名古屋哥哥"就好主動咁話佢幫我影相
"あの人は とても優しいと思います"(我覺得呢個哥哥好細心體貼啊!)
佢最初都以為我係日本人,所以同我講日文,當我表露身份自己係"龍(聾)的傳人"時
佢就同我講普通(日式)英語,仲依然好友善咁主動幫我影相
之後去到其他觀光既地方,只要佢地响我附近,佢都會主動幫我影相架!
好彩我只係"聾的傳人",而唔係"啞的傳人",所以大家都仲可以溝通到
呢幾年多左去日本旅行,漸漸發覺日本新一代既男士有部份都變得有風度
少左d傳統日本大男人個性, 反而香港d男仕們就....
姐姐妹妹們,宜家大家多條出路喇 ~
加油! 
名古屋に住んでいるお兄さんへ
おかげて 楽しい思いをさせてもらった
本当にありがとう
(致名古屋哥哥:你俾左我一d開心既回憶,好多謝你呀!)
鐘意去日本旅行,其中一個原因就係鐘意呢個地方d人
次次都俾我响旅途上可以遇到呢d咁友善既人
就算一個人去旅行都唔會覺得悶架!
呢邊d花無經過刻意既排列,咁仲多左一份自然美添!
我崇尚自然唔造作,又唔鍾意"咁正常","咁有規律"
所以呢兩張相又係"賣非佛"
就係鍾意佢地夠晒"凌亂","自由奔放"
呢度真係一草一木都係經過刻意既安排
9月17日時,呢兩排樹仲係綠色
睇下宜家佢既近照先 ~
(下面d相係黎自富田農場網頁)
10月25日已經變成咁樣
仲有紅葉添 ~
咁即係嚴冬好快就黎到富良野喇!
而响呢度望出去,一望無際既遠景,就係北海道另一個地方:十勝
嗰度出產優質既農產品
响呢度既觀光時間係45分鐘,都真係有d趕架!
導遊姐姐响度等緊d鴨仔上車
自由行黎呢度既話,响JR中富良野站落車,步行大約25分鐘
或者
响"ラベンダー畑"站落車,步行大約7分鐘
(此車站按季節開放)
追伸
呢張相片黎自富田農場既網頁
富良野既"名物"薰衣草都有出品雪糕,不過我無買黎食
因為之前集合各方人仕既"食後報告",大家一致都無話薰衣草雪糕係好味
反而"まずい"(難食)呢個評論就有聽過
再加上自己都唔欣賞薰衣草d香味,嗅覺同味覺既評價都唔高之下
所以索性慳返200幾yen添!
沒有留言:
張貼留言