4月7日 (星期六) 陰天
溫度6度-12度
哩日嘅溫度持續低溫,但响大阪同京都,即使溫度相同,感受都唔相同
大阪嘅高樓大廈,仲有汽車跟京都已經唔相同
哩日不至於係凍入心肺
最後一個全日留响大阪,既然係星期日,咁就買張抵用車票四圍去
次次去大阪都會去巡嘅outlet,哩次都係第一之响哩個季節出巡
完全無收穫,都係入秋後黎買野,咁會多d夏季貨品減價
哩全個行程最後一個午餐,計劃去食炭火燒肉
去到竟然係臨時休業.....唔係咁黑仔嘛?!
一時間都唔知要去邊度食午餐,當時已經係13:30
諗諗下
阪急三番街有一間燒肉店,風評都唔錯,食評網站得分3.56(滿分5分)
哩間都係其中一間後備食店
注文係哩個"ステーキ重",盛惠880 yen
價錢的確相當抵食,不過就無乜咁特別
從上次响金沢因為落大雨而錯過左燒肉午餐,一直都心思思想食燒肉
哩次終於都心願達成,原來情況同之前响百年老店:北極星食"蛋包飯"係一樣
驚喜欠奉,港式义燒唔會比佢遜色
食店: 本みやけ
食完午飯响梅田一帶流連,以前住响民宿就响哩度附近,所以相當熟識
民宿附近有大型UR団地(即係香港公屋)
有d大型UR団地嘅環境同香港d半山舊式豪宅,外表睇黎無乜分別
下圖都係一個大型団地,鳥言花香又有公園,環境一d都唔差
団地附近又有間咁優雅嘅餅店/麵包店,睇落住响度一d都唔似基層人仕
又黎到哩度一次買左8個布丁,準備帶佢地入境香港
唔知香港有無人曾經帶佢地入境呢?
白加煎會唔會係香港入境歷史上第一人呢?
真係愛佢地愛到要迫佢地私奔到港
一不做,二不休,反正都係要私奔運返香港
咁就黑白二色都運入境啦!
白色係焦糖布丁,黑色係"脫印"咖啡啫喱
相當奇怪喎,响香港日式超市暫時無乜見過"脫印"布丁
只有難食嘅"心領"布丁,所以要食好野又係要付出勞力+品味能力
到底運佢地黎香港,到埗後會唔會粉身碎骨呢?
除左要偷運"黑白小鬼"入境之外,仲有香港買唔到嘅"良心企業-日清"嘅雪藏拉麵
不過賞味期限唔長,所以唔可以大手入貨
哩次响超市見到由另一間企業出品嘅拉麵湯底
賞味期限長好多
當然不能視若無睹,掃!
哩區有個毛馬公園係有名嘅賞桜之地
哩日係星期六,下午時段黎到哩度確實見到有d人响桜花樹下野餐+賞桜
最後一晚超市晚餐仍然係 哩個百食不厭嘅配搭
翌日係早機返香港,哩晚為左執行李都搞到相當夜
尤其係要運送"黑白小鬼"到港,佢地一直要放响雪柜直到出發去機場前
所以要準備好如何包裝佢地
唔可以臨出發先諗4月8日 (星期日) 陰天
溫度3度-15度
哩日繼續低温?
不過白加煎一d凍嘅感覺都無,因為一早就要做苦力,一人拎3件行李去機場
天未光,5點己經起身執行李,白加煎一直都牢記"黑仔"仲响身邊,所以唔敢鬆懈
稍有差池,隨時要滯留大阪,到時肯俾錢都未必即刻返到香港
復活節假期,乜航班都全爆滿,有錢都無位,所以早d出發會安心d
"黑白小鬼"連埋冰種+保温袋就係咁樣駆け落ち(離家私奔)
哩次入住嘅東橫inn都有可取之處,就係06:30已經有早餐供應
不過相當有趣係下圖注明: 請客人唔好穿着睡衣去食早餐
拿拿林食過早餐就check-out走人
當時只係朝早7點哩次住谷町區,比起以往住民宿時,哩區比較接近機場,但反而哩次比以往更早出門
實在相當擔心會"衰收尾",所以寧願做個緊張大師
去到機場時相當多人,排隊check-in,過海關都花左唔少時間
因為要偷運"黑白小鬼",所以哩次一直到有預留幾kg重量俾佢地
所以都唔似得以前咁樣買得瘋狂
另一個原因係當日元瘋狂颷升時,個人理智度都會同步颷升
哩次"大仔行李"+"黑白小鬼"都只係22.1kg,而ANA又增加左經濟客位寄鎗行李嘅重量
哩次行李無過重呀!
至於手提行李都只係得8 kg 咋,最乖都係哩次!
响哩個時間"黑仔事件簿"又黎喇
乖乖排隊等過X-RAY檢查時,白加煎忽發奇想:
從無試過過唔到X-RAY要俾人搜行李,哩次會唔會要獻上第一次呢?
結果
好嘅唔靈醜嘅靈"細仔"(背囊)過唔到X-RAY要全部物件倒晒出黎示眾
有無咁黑呀?!即時大叫:勘弁してよ!
倒出黎嘅野,有日本買嘅書,業務用嘅烹調食品
仲有女性個人用品(用膠袋放好)
負責查白加煎嘅海關男職員都有d唔好意思
唔需要白煎全部倒出黎示眾
佢只係話一袋袋放入膠籃上,佢攞去再過X-RAY檢查
再過X-RAY就會無響喇..........係咪玩啫?!
咁搞搞下都花左d 時間,本來諗住仲有大把時間响禁區逛下
點知原來只剩15分鐘就要登機
响禁區見到ROYCE朱古力,平到無朋友,價錢係香港嘅6折左右
買左一盒做手信,同事超讚,連"法(癲)男"都讚
大家都估唔到日本朱古力
可以做到哩個水準比起以前只重奶味,哩次有埋可可味,仲扮到來路貨添!
响禁區都發生左一件不耐煩事件
不知規舉為何物嘅國內人,佢地响機場免稅店大手掃貨,咁都唔係問題
最大問題係為乜排隊到自己時先慢慢數現金,數數下又話要用"銀聯咭"
又問哩樣問嗰樣......阻住地球轉
白加煎"苗"到佢地張登機証,當時已經係上緊乘客,佢地仲相當大安旨意
難怪每次去日本都坐ANA嘅白加煎
經常都俾ANA嘅職員指住個牌問:你係咪坐哩班機?
終於上到飛機,準時起飛咁先鬆一口氣
哩期嘅飛機餐都唔差,哩個主菜好似係黑芝麻汁豚肉,個樣麻麻,不過味道唔錯
回程由日本返香港,甜品又換左喇,但只係越換越差
哩個比"心領"出品嘅布丁不相伯仲
不過無所謂啦,白加煎迫"黑白小鬼"私奔到港,所以哩次唔同ANA計較
响飛機上睇左一套好戲:幸福麵包
落機返到香港熱到乜咁,好彩黑仔都未至於搞到遺失行李
全部3件行李齊齊整整帶回家
連"黑白小鬼"都完好無缺,無粉身碎骨咁大駕光臨寒舍
~ 追伸~
次次坐機場巴士,都一定有事係睇唔過眼
唔明點解坐巴士嘅人都咁自私,點解可以成個行李以橫屍方式擺放,霸晒成個行李架?
(可能哩d人都只係預演緊自己人生中最後一個pose
)行李架最下層,就咁俾三個人,其中兩個係自私精霸晒
行李架中層就個個都係自私精
除左哩樣之外,底層哩兩個自私精連細行李都放最底層
底層滿晒,推住大行李嘅人就要舉起個20 kg 行李放上格,到底d人係自私還是死蠢呢?
心照不宣
難怪白加煎去到日本會盡量避開香港人,事實上有好多香港人嘅行為係令人側目
再次証明白加煎成日都話香港人中,有同理心嘅少於20%
哩個數字唔係亂作出黎
沒有留言:
張貼留言