4月4日 (星期三) 晴
溫度6度-13度
朝早有足夠嘅休息加上無行程
所以一早起身食完早餐就準備離開岡山
上網睇下用電郵取消預訂左今日要check-in嘅德島酒店
不過對方無回覆落到酒店大堂都仲係嗰個態度惡劣嘅靚女職員
都係唔再搵佢幫忙,無謂一大朝早就睇人面色,自討沒趣
趕快食完早餐就行去高速巴士站,當日由米子坐高速巴士到係响哩度落車入去買即日票,同d職員表示自己嘅日文唔太好,只明白簡單應對
售票姐姐相當細心,最後仲再問白加煎知唔知邊度上車
哩d先係服務行業應有嘅態度
宜家敬業樂業嘅人通常都唔會係後生嘅一群
高速巴士嘅中途休息站
無聊坐車都係要買d零食
哩個麻油紫菜+鹽嘅"卡落d"都ok啦,只係無乜驚喜,不過"厚切り"係好食d
終於都返到大阪,其實當時心入面有d安心嘅感覺
話晒哩度係熟識之地,而且有國際機場,感覺上唔會係"叫天不聞,叫地不應"咁無援
行程最後3晚會入住谷町站嘅東橫inn,不過因為房租比較平,所以房間已經滿房
咁唯有住梅田東哩間,以前都住過哩間,所以就揀哩間入住
下晝兩點去到check-in,大堂都無客人
拿拿聲要酒店職員幫忙,打電話去德島嘅酒店取消預約
哩次嘅職員係一個肥女子,佢個樣似日本諧星藝人:村上知子
除左個樣唔及岡山嗰個態度惡劣靚女職員外
佢都唔及對方咁話頭醒尾
白加煎先向佢表明日文唔太好,請佢幫忙取消預約左嘅酒店
最初佢望住預約信入面嘅訂房日期,就誤以為係泊宿日所以佢疑惑點解過左泊宿日都仲要取消訂房
不過經過白加煎嘅解釋,最後佢都明白
肥職員嘅態度都相當友善咁致電德島嘅酒店取消訂房
聽佢同對方職員講電話都相當有禮貌+客氣
哩次額外服務後,哩個肥職員更加記住白加煎泊宿嘅房間號碼
外出回來,佢就自動遞上房間鎖匙,哩d先為之貼心服務,要讚!
所以白加煎從來都唔相信外表,實力/肉涵先係最重要,好過虛有其表
哩次被編排嘅房間比上次高層數,不過同樣都係俾行車天橋阻擋視野
返到大阪已經係下午時間,半天吊時間,咁唯有去附近shopping買手信
哩日連午餐都慳返,之前為左會去德島山區觀光
所以買左少少乾糧: 餅乾+蜂蜜蛋糕用作中途可以醫肚
結果哩d食物响坐高速巴士返大阪時就全部掃晒入肚,唔想浪費食物
又明知去到大阪,乜都有得食
仲點想食哩d乾糧呢?!早d食晒以免眼冤
全個行程都未食過"りくろ"布丁
咁就點都要去買黎食哩間係梅田附近,長柄區嘅分店
因為接近住宅區,所以人客比較少,服務都比較貼心,至少唔駛排大隊
去到時接近關門時間,佢地就提供免費試食想盡快出售餘下嘅即食食品
白加煎就試食左草莓大福
其實都幾好味話晒都係新鮮食品,特別好味
不過賞味期限只得一日,大福
用糯米做又會相當飽肚,而又係一盒兩件裝
太多食唔晒.......最後都係照原本所想,買左布丁+什果批
又係黑仔事件簿出場
離開餅店後步行返酒店,路程都唔近,因為已經相當熟識哩邊,所以諗緊行捷徑
(以上圖片只供參考,事發時係天黑晒,相片右邊係白加煎所企位置)
諗到入晒神
見到對面馬路嘅車停落黎,就以為已經轉左綠燈咁咪行出馬路
行到1/3時抬頭一望先發現仲係紅燈,快步轉身行返上行人路
一到行人路之時,即時有車响白加煎身後相當近嘅位置颷過
白加煎即時心諗:好彩無事!
可能因為天黑齊,所以個司機都無發現有人衝左出馬路
點可以唔相信哩次旅行係諸事不順,但又會大步檻過呢?!
布丁買左兩個,所以晚餐+翌日早餐都有甜品
因為仲有幾日就返香港,到時想食都食唔到
所以唔理係咪早餐,想食就食
以下哩張相就表明左為乜白加煎會"為佢情迷",只有係咁厚身嘅布丁先會出現以下嘅情況
沒有留言:
張貼留言