4月5日 (星期四) 晴
溫度11度-18度 
有一段時間無出場嘅黑仔事件簿,當返到大阪哩一片熟識之地
間中會鬆懈落黎之時,一股霉氣間中又有機可乘
响心齋橋逛到下午4點半左右,就拎住大袋細袋咁急住趕返酒店
可能哩份心情同d媽咪趕住湊仔放學係大同小異
事實上白加煎都係要去湊仔.....响倉敷暫別左3日嘅大仔(行李)
仲有是日朝早check-in後寄存响東橫inn嘅細仔(背囊)
大仔响哩日中午時段已經被黑猫父子運送到大阪東橫inn
返到酒店响front desk認領左大細仔(行李)後,拿拿林上房安頓好所有野
因為又要趕出門
黑仔事件簿又要持續更新喇~
出左電梯一睇,316號房間好似幾闊落喎.....即時有d暗喜
打開房門後眉頭都皺:唔係嘛.......
大門對正洗手間,右手邊係衣柜,活動空間响左邊
哩條小通道只有咁闊,咁邊度放行李呀?
最後要移開枝企燈先勉強可以橫放個行李,但個轆就係頂住個雪柜
一係就行出行入自己會碰到......相當污糟喎~
哩個格局嘅房間係第一次住,傢俱擺位比入住細間小小嘅平價房仲要差
但哩間唔係特惠房間喎,一住就4晚,偏偏就响入住最長嘅日子發生哩d不滿意事件
唔好咁多怨言,因為趕住要出門
哩日趕住去賞桜,今年桜花姍姍來遲,終於返到大阪先叫做似返樣
因為仲係學校假期,又到左賞桜之日,為免人迫人,又為避開強烈紫外光
所以決定黃昏時段先出動會好d
一如所料,人潮散去無晒旅行團,一家大細嗰d已經返緊屋企準備晚飯
咁先可以慢慢影相,唔駛同人爭
3月26日嘅大阪城公園早上時段
一片乾枯
都係2006年12月初嘅風景靚好多
白加煎覺得就算哩個畫面變晒做桜花,都未必及得上圖中哩個氣氛
其實桜花雖然美,不過其他植物都未必比它失色
終於都見到桜花,不過都只係開始盛放
個別早熟桜花樹先有咁燦爛盛放
天守閣嘅另一邊仍然係咁枯乾
相當鐘意哩個意境
唔刻意講都未必意會到相中嘅係桜花
即使相中哩棵桜花全面綻放
但都比不上上一張相片嘅意境
大阪城公園嘅另一邊,反而更加令白加煎着迷
為哩d不知名嘅植物,影左好多相
離開大阪城公園都已經天黑
諗住响酒店附近搵超市買晚餐,之前已經印左地圖
又記得朝早時步行出去心齋橋時都有經過超市
但入黑後就點都搵唔到
一間都搵唔到先係最離奇
行左超過90分鐘,越夜越凍唯有放棄
响便利店乜都揀唔落手,零食薯片唔想食
睇中左個減緊價嘅"脫印"布丁,點知俾錢前又俾個歐巴燊掃埋餘下兩個
乜都唔順利,咁唯有只買個"良心企業"嘅杯面
好彩之前响難波都買左布丁,總算有佢都補償到少少心靈安慰
沒有留言:
張貼留言