2012年一人黑仔之旅DAY 12@岡山 (爆彈低氣壓)

 

 

JR岡山站外有桃太郎(人型版本)+野雞,馬騮,狗兒嘅石像 

仲有真實活生生版本嘅野鴿+烏鴉 


4月3日 (星期二) 雨 溫度11度-18度 





四國行程決定取消,哩一晚會泊宿响岡山 



哩個爆彈低氣壓嘅成因就係一股由韓國向南吹嘅寒流 

遇上由南而上嘅一股暖流,一撞之下就突然形成低氣壓,橫掃日本本洲 

由西日本掃上北海道,哩次係白加煎第一次响日本遇上天災 

一次都夠喇,以後請高抬貴手





不過後來睇新聞報告白加煎遇上爆彈低氣壓時身在岡山 

岡山比起其他地區算係天下太平 

至少中午至下午時段,一度停雨,只係持續有超級大風 

比起西日本其他方已經相對已經好好多

天氣咁不穩,都唔會再有心情要觀光 



唯有逛車站商場,其實都有d關心交通幾時全面通行 

因為西日本至東京嘅新幹線已經全面停駛 


  

車站越塞越多人仲有唔少係着晒西裝嘅上班族 

睇佢地個神色,應該都係"出張"後要返東京 


 

電視台响車站拍攝,全個看板無晒行車資料,只出示"停駛"字句


 

5 pm - 新幹線嘅看板上,最後班次資料時間仲停留响下午2點嘅班次 

往後再無更新過 

乘客就算趕到哩d班次都唔會係好彩 

為顧及乘客安全,當風速超過限制時,列車開行到邊度都要即時停駛 

與其有可能被困車廂咁寧願响車站等好過,話晒都舒服d  


傍晚時間,岡山又再度落雨 

响商店街內有個路牌橫躺地上,哩個位的確係食晒風 

好幾次响度等過馬路,途人紛紛吹到企唔穩

 

哩晚無準備停留岡山,突然間都唔知要去邊度食晚飯 

天氣不穩又唔敢四圍走,都係响車站入面間超市搞掂晚餐

 

檸檬味嘅"卡落d"薯片絕對係怪,不過食之前都預左

士多啤梨係大粒不過唔算係甜 

即食杯麵當然繼續支持良心企業"日清" 


買完晚餐就返酒店休息 

一踏入酒店,全個大堂塞晒"西裝友",都差唔多肯定佢地係出張完畢 

打算坐新幹線返東京嘅上班族 

當時係晚上7點幾.哩個時間岡山嘅新幹線都無聲氣會復行 

咁都代表即日返東京無望,所以佢地就搵酒店泊宿 



不過佢地係住最貴,設施最好,又係高層嘅房間
 好彩白加煎一早訂左間普通房,如果傍晚先決定泊宿岡山 

咁就仲要同哩d人一齊爭房間 咁都唔係個個"西裝友"可以入住最貴嘅房間




返酒店休息,一邊睇電視新聞,先知哩個爆彈低氣壓嘅威力 

 

和歌山錄得最高風速 41.9 m 

咁就等如係每小時150公里,香港天文台會識別哩個係強颱風 


 

哩個中學生先驚險,佢住响鳥取,因為係沿海地區 

當日都食晒風,佢同另外兩個男同學推住自己嘅單車逆風而行 

不過後來吹起一陣強風,佢捉唔實架單車 

單車被吹走佢就即刻扶實電燈柱,以防吹走埋自己 


 

比起關西,岡山算係相當平靜 

午後2點幾,關西地區突然風起雲湧 

低氣壓黎得毫無先兆,神戶有d地庫店舖仲搞到大水浸 

 

 
  

  




雖然白加煎話自己全個旅行都黑氣跟身,不過確實係黑又黑唔晒 



中午時間JR仲未宣佈停駛之時,有一架由四國高松駅經瀨戶大橋嘅列車照常開行 

去到瀨戶大橋時,測到風速過急,即時需要停駛 

結果全車170人逗留响列車內,列車就停留响瀨戶大橋上 




到左傍晚7點半後先再可以開行,乘客落車後接受訪問都話停响瀨戶大橋上 

風急又猛,感到搖好似飲醉酒咁唔穩

 

當白加煎知道JR停駛,無可能坐JR入到四國之時 

一度諗過改坐高速巴士入四國 

不過原來當時風急到連瀨戶中央自動車道都全面封鎖,停止行車

 到左晚上先解封

 

都似乎係註定左哩次旅行,同四國無緣