4月6日 (星期五) 下午轉晴
溫度6度-10度
離開寺田屋後,下一站係鴨川+白川,目的係最後衝刺: 賞桜
能夠响京都賞桜,曾經係最大嘅心願
哩個時期京都嘅桜花比大阪嘅開得還要遲,京都比大阪凍少少,所以開花期都會遲少少
上圖海報中所見,京都地區一半以上地區嘅桜花仲未開,但大阪已經盛放中
坐電車離開寺田屋,响衹園落車沿住鴨川行去白川
途中影左哩d相
哩張相嘅藍色天空+白雲,似係油畫效果,原來"痔頻"嗰句名言都啱唔晒喎
"假的真得了,真的假得了"
可能係落錯車站,行左好耐都行唔到去衹園,凍得要命
哩日相當後悔點解唔帶晒餘下所有暖包响身
以下不知名嘅植物一直都相當吸引白加煎
當初春各種植物都仲未冬眠完畢,唯有佢地毫不吝墻地燦爛盛放
為左取暖一陣,唯有不停巡手信店
不過哩日無論點過暖河都係凍,一對腳板完全處於"結冰"狀態
幾經辛苦先去到白川
盛開嘅桜花的確比行程第二日黎觀光時多
不過盛開嘅桜花同時都帶黎人潮
白川哩度失去左一份寧靜同時好似聯合國咁,各式語言都有人講
人潮蜂擁而至,哩d食店門外嘅小橋都掛上告示牌
私人地方,禁止站立
離開白川就要食午餐,即使只能半飽都要食,結果响便利店買來個蜜瓜包
相當唔錯呀!比起以前响麵包店用更貴價錢買嘅蜜瓜包
哩個唔見得差,以105 yen嘅價值,絕對有意外驚喜
留意上圖,白加煎食麵包嘅地方係有貴價酢鯖壽司食嘅衹園いづ重
行程初段响京都觀光時都曾經慕名拜訪過,果然係名不虛傳
因為哩間食店門外有長櫈,所以白加煎坐响度食
一邊食一邊為自己打氣
忍耐多3個鐘,今晚晚餐都係酢鯖壽司
仲要係一整條,而唔係哩間食店嘅半條(切開只有3件)
もっと もっと 我慢して
食完個飢餓午餐,順便去埋圓山公園,知恩院响入面
圓山公園內有哩d小攤檔
相當有特色
不過只有興趣影張相,但無興趣買黎食,500 yen一條燒魚
相片中大概都有100條燒魚...... 100條 x 500 yen=50000 yen
哩盤生意都幾好賺咁喎!去到哩區,當然要去搵夢地藏+totoro店,次次去京都要係必去哩個地方
哩度二樓係展覽館,樓下一樓係totoro店
樓下就相當多人
樓上就相當清靜
樓下totoro店嘅各式貨品,黎到哩間舖頭,有好多香港人
京都大街上隨便一角可以搵到哩份閒適
小橋+流水+桜花+high tea
=享受
如果哩日唔係要守齋,真係要入去high tea一陣扮high
觀光完畢只係下晝5點,但都已經搵緊晚飯食店
又餓又凍,寧願盡早食完晚飯返大阪
不過哩日絕對係考驗自己嘅堅毅度+轉數
上網搵到哩間又係食鯖魚壽司相當出名嘅小店,得分3.68(滿分5分)
可能白加煎已經飢寒交迫得有d神智不清
連地圖都睇錯方向哩間店近京都御所,不過白加煎就不停响河原町嗰邊搵黎搵去
幾條小街都已經行過都搵唔到,天都開始黑,對方响晚上7點就收舖
突然沮喪得想放棄
不過哩日為左守齋,選擇唯一可以食飽嘅係晚餐,全日不停期待哩個晚飯時刻
唔通就咁放棄?
諗到前一晚又係因為搵唔到超市而晚餐只食杯麵,唔通今晚又係杯麵?
留多一日就返香港,返到去就要同鯖魚暫別喇......
最後決定俾心機搵多一次,睇唔明自己嘅地圖,咁就落車站睇車站嘅地圖
(要搵另一個方法,可能會有新轉機)
新方法果然湊效,哩次搵啱車站出口,終於都搵到開餐喇
超級開心
証明左有鍥而不捨嘅精神
並唔代表事情一定會成功之但係如果欠缺哩份堅持,就相當肯定成功唔會自動送上門
堅持唔要劣品,為上品先會甘願付出據為己有
要評價係上品,還是劣品,哩個就睇個人見識+智慧以上說話絕對有弦外之音.....(皆、分かる?)
白加煎當然係一個"眼高手高"之人仲有人會追睇哩度嘅遊記,咁已經證明本人"眼低手低"極都有限,仍然係有可取!
跟衹園いづ重唔同
哩間末廣位於小街,無華麗裝修,只由一個上年紀嘅婆婆+一個中年男仕打理全間舖
都應該係家族經營嘅小店
白加煎都幾鐘意去哩d小店,總係好有日劇氣氛
餐牌只有哩一張
注文當然係新寵兒: さばずし(鯖魚壽司)盛惠1850円
外面凍到得幾度
哩個暖爐只提供19度室溫,都已經係大救星
哩次17日行程中,一共食過3次酢鯖壽司.....いっばい幸せだった
對酢鯖魚總算有少少心得,酢鯖能夠保留到越多生嘅口感,咁濕潤口感會強烈d
熟嘅口感比較重,咁食落就會乾身d,咁即係少d魚油(omega 3)
如果要評份,最高分仍然係衹園いづ重,生熟比例係80:20
末廣壽司都叮噹馬頭,生熟比例係 75: 25
米子-米屋 吾左衛門鮓 ,生熟比例係 65:35
雖然話末廣輸左少少,不過仍然會列佢入waiting list,來日有機會可以再去
白加煎鐘意哩d地道小店風味
以下係網絡圖片,店舖入面就係咁平實
米子-米屋 吾左衛門鮓 ,生熟比例係 65:35
雖然話末廣輸左少少,不過仍然會列佢入waiting list,來日有機會可以再去
白加煎鐘意哩d地道小店風味
以下係網絡圖片,店舖入面就係咁平實
食完晚飯唔覺得暖左,都係即時坐電車返大阪
而且朝早己經鎖定左谷町區內一d舖頭要回頭去買野
2012年嘅耶穌受難日發生左唔少"第一次"
第一次响哩日係身在外地遊玩第一次咁飢寒交迫
第一次絕對無心思思想食零食,全日意識上掛住凍多d
第一次將守齋時間自訂响零時開始,24小時後結束,而且哩次比以往N次守齋吃苦得多
踏正零時
零食黎喇
確實唔係有心癮想食零食,而真係有d肚餓但又唔想咁夜仲食得太飽
哩包"卡落D"薯片同ROYCE朱古力crossover,但一d可取都無
沒有留言:
張貼留言