
9月8日(星期三),金沢,上晝豪雨 


第9號風球終於殺到黎"北陸"地區,到埗當日既黃昏時避得過無落雨
第二日終於都不得幸免
一朝早打開窗簾就係呢個情況,而雨就越落越大,直到下晝先受控
第二日終於都不得幸免
一朝早打開窗簾就係呢個情況,而雨就越落越大,直到下晝先受控

臨到上車返大阪時先肯停雨
我確實係貴人,一出門就招風雨,一返歸佢就停雨
呢次行程中,我住左3間東橫inn(松本,金沢,大阪),今次係住"金沢站東口"嗰間
打開窗有街景呀,算唔錯啦!

呢間d電視機就仲係用緊舊款細電視,不過都無所謂啦! 

我上次响札幌住package既酒店,咪一樣係睇呢d古董電視機
嗰陣時仲要迫我住密室黑房添呀
最頂氣係札幌嗰間酒店既房租仲貴過東橫inn簡真係自以為懶高級
其實就係cheap到嘔
所以難怪我到宜家仲係支持東橫inn
房間夠光,走廊又夠光猛, I like it
陽氣咁盛,無有怕啦!

呢間東橫inn既大堂放左一個鐵架既小咭仔任d客人攞

其實大部份都係廣告,不過d相影得咁靚 
d畫又咁有style

攞黎留個行程紀念都唔錯
金沢呢個城市為觀光事業既發展,的確係花左唔少心思
只係响車站/酒店都可以攞到既詳細觀光地圖
响京都都唔會有呢個咁體貼既服務
某部份既東橫inn係設有免費晚餐--咖喱飯
提供俾住客
上次我响札幌時住嗰間東橫inn都有呢個"賣大飽"服務
如果唔講究食既話,咁响呢度就連晚餐時間都唔駛幫趁"松屋","吉野家"
都可以慳到少少錢架!
不過夜晚唔會食五穀類既我
,就同佢緣慳一面喇!

食完早餐,將個"細仔(背囊)"交俾酒店幫我暫託之後
我就要冒雨咁展開一日行程

咁樣落雨法,唔駛一陣間已經係全條褲,全對鞋都濕晒 (濕住又up住絕對唔好受)
不過全日既心情又唔算係太差
呢日會响金沢逗留到5pm先會坐高速巴士返大阪
所以就要買個1日pass方便觀光
要買呢d pass就要去JR站呢個"巴士/的士詢問處

响金沢觀光,最抵買係下面呢張PASS-500yen
基本上可以任坐"金沢周遊巴士"(傻巴士)去到金沢車站東口一帶既景點

而下面呢張係900yen既1 日pass,佢除左可以坐指定觀光巴士之外
仲可以任坐市中心一帶,單程車費唔超過230yen既普通巴士

即係可以坐"傻巴士",仲可以坐"普通巴士"
不過我都唔係為左方便觀光而想買呢個900 yen既pass
金沢呢度最出名既當然係海鮮刺身,一早已經安排左點都要幫趁
除左海鮮丼之外,仲俾我搵到一間食和牛既食店,午餐既價錢仲係相當咁抵食
咁樣一份和牛set lunch只係1000yen
雖然份量唔係好大,墊住d和牛既係烏冬麵,但點計都係吸引,話晒都係和牛黎喎
而且食評網站上俾呢間食店既分數都唔低分架,咁我當然係好有興趣食啦
無懼要攀山涉水,只係想可以用負擔得起既價錢而食到人間美食






呢個係我既"遊日忠旨"
出門去旅行,就係想可以放眼世界,唔再困自己响井底
呢間食店並唔係响金沢東口既觀光區,反而係相反地方既車站西口一帶
要去就要坐巴士,就係因為咁,我先想買900 yen既pass
可以坐埋"普通巴士"
我去到詢問處同賣pass既女職員講我想買900yen嗰張pass時
佢就用佢d流利但充滿日語口音既英文同我講野
上次响札幌JR站遇到一個英文口音相當好,又講得相當流利既女職員
而金沢呢個地方都一樣見到有"鬼佬/鬼婆"既遊客
所以我就估計

响呢度做JR既職員,應該點都要識基本既英文應對
而眼前呢個女售票員既英文雖然都算流利,但都係聽得我幾辛苦
不過大致上都會明白佢講乜既,佢叫我買500yen既pass已經夠用
(唉!我夠知啦,不過我要去車站西口嗰邊食和牛喎!)
佢同我玩"英語猜謎",我同佢講"日語猜謎"
不過响我同佢講日文之後,佢就係用流利日文同我講野
講左一陣大家都9唔搭8咁樣,佢就同我講左呢句: ....意味が分かりません
唔明我講乜?!

當堂有d火起
我已經好遷就佢先同佢講日文我d日文雖則係"屎",不過都不至於會係咁樣辭不達意
我幾時連身體語言都咁差呀?!擺明呢個售票員係ばか(死蠢)!
其實佢都可以堅持同我講英文架.....如果佢d英文係講到既話.......
俾佢咁樣侮辱我d尊嚴
終於我就摷晒d食店地圖,地址出黎同佢再講過"屎日文"
(低B婆呀
當時的確無諗過要同佢講英文
就算佢識用英文答我,但佢d口音都係要我猜謎語先搞得掂
我最無耐性玩猜謎語架喇!
响我出盡智慧+急才咁同佢講日文時,佢終於都知我要去西口呢間和牛食店
而最後係發現去呢間食店既車費係高於230yen
咁即係買呢張900yen pass都無用,咁都係買返張"傻巴士"既500yen pass
其實呢日天氣咁差,當時都唔肯定係咪可以按本來既行程去食和牛?
雖然話呢架係"傻巴士",不過去金沢既話有佢就方便少少(但無佢都唔會死)
東口呢邊既觀光區係相當集中,全程行路都可以架!

一朝早出發,大多數既遊客坐呢架巴士都係順次序咁觀光
所以大部份人既第一個觀光點都係6號車站既"ひがり茶屋町"
而我就係去9號車站既兼六園
呢次行程之前,從來都無諗過要去金沢
呢次會去金沢又只係因為順路
所以只係揀左幾個景點咁就搞掂金沢既行程
因為天氣既影響,再加上5pm就要坐高速巴士返大阪
所以呢一日既行程只係"兼六園","金沢城","近江町市場"
只係睇下面張相嘅大雨點,都可以見到當時既雨勢幾咁豪

第一站係兼六園,佢係日本三名園之一,由江戶時代保留至今
只係去兼六園既話,入場費係300yen
如果買500yen既"兼六園+1"既入場劵,咁就可以去多一個指定景點

500yen可以去下列其中兩個景點

而我對金沢城既興趣只係麻麻 
日本實在太多呢d城池喇
其中仲有唔少係後期複制出黎既"假野",金沢城都係其中一個
所以最初只係打算俾300yen去參觀兼六園
下面呢張就係原先買既300yen--兼六園入場劵

兼六園既名稱由來
加賀藩前田家族第五代藩主前田綱紀响1676年開始與建
作為金沢城外圍建構既庭園,本稱為蓮池庭
到左第十二代藩主前田齊廣,就以宋代文人李格非响《洛陽名園記》所述
名園難以蓋全既宏大,幽邃,人力,蒼古,水泉及眺望等六項元素
就將呢度易名為兼六園

呢度係兼六園外圍既"茶店通り" (江戶町通り)

呢條街真係有懷舊氣氛,的確有d似京都

1601年,將軍德川秀忠既女(還珠格格:珠姬)嫁黎呢度
陪嫁既仲有300人(當中包括武士)
咁當時呢d屋就係俾呢300人入住,响珠姬過身之後,住响呢度既人就搬返江戶
當時隨即就拆去呢d屋,後期先再重建呢d屋
响平成元年(1989年)呢度先改為茶店

去兼六園觀光,可以跟住下面既次序行
不過當日既雨係越落越大,已經唔可以跟常規去做事
當時只有係觀光,避雨再避雨

兼六園既面積都相當大,大約有114,500平方米,入口都有幾個
而下面呢個就係"桂板口"既入口

兼六園+岡山市既後樂園+水戶市既偕樂園被稱為"日本三大庭園"
霞ヶ池係呢度入面最大既水池
幻想一下呢度開滿紅葉時,確實會係幾靚

靚,靚!
呢個係兼六園既地標-徽軫灯籠
當時落雨令我太狼狽,完全無留意原來有d楓樹已經變色中


搵張網相圖片出黎做下勢先
呢棵楓樹同呢盞徽軫灯籠完全係一對絕配


呢d"早熟"既紅葉,雖然仲未變紅,但都已經係變黃中.....
雖然唔及紅葉咁震撼,不過又黃又綠咁,都為呢度添多一點色彩

當然仲要對美感有敏感度,咁先影到靚相架啦
用傻瓜機都可以影到靚構圖,用專業相機都可以影到傻瓜相
專業相機只係工具,而唔會突然將人變得"專業化"

如果唔係一直都落雨,咁响兼六園係可以影多好多靚相
唯有等下次啦!

半天咁高企左一個身高6.5米既石像,夜晚見到仲唔夠驚嚇?
日光日白見到呢件野,其實個心都有少少不安感


呢個石像無論遠睇定近睇,都係有d恐怖(怖がったよ)
兼六園入面既金沢神社,呢個係"神門"

金沢神社拝殿

奉納稻荷鳥居

雨越落越大,連影相既心情都無晒 
咁大雨仲可以去邊呢?
咁大個兼六園,要迷路真係好易,再加上實在太大雨
唔想再花太多時間留响無瓦遮頭既地方黎認方向/睇指示牌
唔想再花太多時間留响無瓦遮頭既地方黎認方向/睇指示牌
又唔想亂撞行錯路,咁最簡單就係開口問d職員....路在口邊
我問左一個售票員去金沢城既方向
佢見到我手頭上既入場票只係300yen嗰張
佢見到我手頭上既入場票只係300yen嗰張
咁係入唔到金沢城入面既有料場所
所以對方就非常熱心咁話幫我換另一張500yen既入場劵
而我就需要補返200yen
而我就需要補返200yen
其實我只係想去金沢城公園外圍影幾張相,都無諗過要參觀有料場所架喎
不過既然對方咁友善,我都唔好意思推辭
唔通連200yen都孤寒咩?!
用200yen參觀,都可以當為傾盆大雨之下時既避難所
總好過百無聊賴企响戶外等雨勢減弱,就係咁樣先換左呢張入場劵去避雨呀!

咁下一站就係金沢城公園


沒有留言:
張貼留言