9月7日(星期二),石川縣,黃昏時間大致天陰
每一次既自由行都係會累積到唔同既經驗
而當呢d經驗係要用錢換返黎既時候,咁呢個教訓就會特別深刻咁銘記於心
立誓以後唔再做相同既蠢事自己一個人去日本咁多次,估唔到都仲要响呢架JR上面做蠢事,老貓燒鬚添!
由富山電鐵要徒步5分鐘左右咁先到JR富山駅
出門唔會帶電腦既我,只有一堆一早就print定既資料
其中都包括左交通公具既出發時間,價錢等
由富山去金沢,上網時睇過特急車係2100 yen
而普通車就係950 yen,抵步時間就相差大約25分鐘
為左快25分鐘而要俾多1150 yen又真係唔多化算,宜家d日元咁貴
用錢時真係要諗多一陣,做個精明消費者
我又唔係趕時間,所以一直都係諗住由富山去金沢只係坐普通車
16:26到JR站,望住呢塊顯示板上既兩班車已經係有d疑惑
特急車?
我應該唔係坐特急車架喎?不過普通車又唔係去金沢喎???福井.....係咩地方?
照買普通車票,入閘前俾個駅員睇,順便問佢我去金沢應該响邊個月台上車
佢當時答左我一堆野,
而我第一句入耳既說話係: 3號月台.....
一聽到3號月台,我就認為係16:36開車,咁要快d去月台等車喇!
响月台等左一陣,越黎越多人.......終於車黎喇,係座位舒適既特急車
終點站寫住係:金沢
月台雖然有好多人,不過我附近都只係有幾個人上呢架特急車
其他人繼續响月台等車
上左車真係覺得好唔對路,呢架係特急車,唔會係950yen坐到架喎? 
但係得呢一架車去金沢,下一班車係去福井.....都唔啱路
如果我唔坐呢班車,都唔知要等到幾時先有車去金沢?
蠢到無倫既我,當時都仲無諗過富山至福井既中途站係金沢
上左車一分鐘就開車,心急住既時候仲邊會有咁清醒既頭腦呢?
"急"住時通常都無乜好事會發生既
終於都開車向金沢出發,個心定左落黎都知道呢架係特急車
如果查票時,我就一定要補車錢
會唔會呢次可以逃過查票時間呢?
記憶中以前由名古屋坐新幹線去東京路程咁遠,全程都只係查過一次票咋!
响架車度我就回想返金沢駅員叫我去3號月台上車既事
即時諗起佢好似有講過"よんじゅう....(即係40)"呢個數字
我睇返影左既相,當堂明白晒係乜事,都即刻知道福井同金沢有乜關係
咪就係16:46出發嗰架車會先到金沢,之後再去尾站既福井囉!
而駅員係叫我坐3號月台,46分先出發嗰班車......
(低B婆呀!你連數字都聽唔到,到底你讀左幾年日文呀?!) 
: 我唔係聽唔到,只不過對方一話係3號月台,咁我已經對號入座......
大安旨意扮晒醒咁咪衰左囉......蠢就係蠢左,仲要俾錢買教訓,因為真係查票呀!
我俾張950yen既車票駅員睇,佢連望都無望我一眼,一句說話都無講
就襟緊佢手上嗰部出票機
我心諗:實俾佢以為我用普通車票摶懵坐貴車啦.....
錢可以唔要,人格不能被貶低,更加唔可以俾人誤會或者老屈都唔反抗
我係"龍的傳人",唔鐘意做d摶懵搵着數既小鬼無恥行為
阿爺教落:唔係自己應得既野,就一定要物歸原主甚至要作出應有既補償
當時我個頭頂出現"正氣光環"
唔該d無正氣既日本人學下我啦~
順便拉開話題少少~
日本人既唔認侵華,宜家仲落實要將釣魚島列入為故有領土,印入教科書入面
呢d行為的確係相當咁無恥,無証無據就亂霸人地既野,完全係賊仔行為
幾十年黎呢個國家都係咁樣,作故仔咁去矇騙d本來仲有良知既國民,洗佢地腦
宜家繼續用歪理黎矇騙下一代
以上既個人意見純粹係"對事不對人"
為左表現我有中國人既正氣,絕對唔係無賴
終於我用自己d"屎日文"去表示自己既"有正氣" 
澄清人格
澄清人格: 唔好意思,我係上錯左車......
: 咁你係去邊?(駅員終於都望住我講野喇!):金沢!............再確認一次: 金沢?!:係!我係搞錯左,呢架係特急車,宜家要俾幾多錢?
咁對方就好有禮貌咁叫我補返1150yen
有錯就要認,打就要企定
呢d先係真君子既行為
回頭是岸,錯事不能一錯再錯 
呢句係由衷向大和人講既
呢句係由衷向大和人講既
其實 佢問我到底係去邊?
佢問我到底係去邊?如果我係完全坐錯方向搭錯車,咁佢應該會俾我落車
又或者如果我好堅持唔想補錢坐特急車既話
可能佢都會俾我落車,等下一班目的地係福井既普通電車
不過呢d咁孤寒小家既行為我點都做唔出
今次就當係俾錢買一個教訓,以後都唔會再有下一次
再有就自摑至死!
出閘時兩張車票都要俾呢班"人肉出閘機"
駅員見到我兩張車票好似好陌生咁,唔通日本人唔多會補錢坐車架咩?
好啦,咁金沢行程就提早少少開始喇 ~
沒有留言:
張貼留言