9月7日(星期二),金沢-傍晚,密雲無雨
精神錯亂咁上左架快d(但貴d)既特急車,咁就大約响5:15pm到左金沢
無端端俾多左錢坐左架特急車,咁就決定响天黑前要一定要觀光
皆因為"第9號"颱風殺緊黎,肯定翌日一定會落大雨 
咁趁住天色仲算可以又仲未開始天黑時,就要拿拿林去觀光
呢次只係安排响金沢逗留左24小時,但我對呢個地方印象唔錯
雖然翌日真係落大雨,仲搞到相當咁狼狽,但就無掃晒興
事實上我幾鐘意呢個地方,用一日時間係唔可能好好地欣賞佢
所以金沢已經俾我列入左會再重遊既地方
下次可以將松本+上高地+白川鄉+金沢再度一個行程出黎
都可能係呢個心情,令到我當日即使係淋到濕水狗一樣,心情都算未受大影響
日本仲保留較大規模古城舊街風貌既城市,首選係京都
其他比較有名既都可以數係高山,金沢
終於都去晒呢3個地方,當中以京都係最有規模
(當然啦,以前既京都係首都喎!)
其次我會推薦金沢,反而我對高山既評價就只係麻麻
京都同金沢都有d相似,兩個地方都有古老既野+時代感既野
但高山就係古老既野+鄉下既野集於一身,响高山連高樓大廈都罕見
以下兩幅係高山既網上圖片,呢條保留至今既古老舊街,响高山係必去觀光之地
全個氣氛係平民既感覺,比起金沢同京都既舊街,高山呢度的確係有d另類
金沢同京都一樣,佢地有好多設施方便旅客觀光
金沢既觀光地圖仲隨手都可以响酒店,大車站免費攞到
(當然係日語版)下面呢本都係响JR車站攞到,真係連買天書都可以慳返
就算無呢d地圖任人攞,咁買觀光巴士1日pass時,睇住車票附有既地圖都已經夠用
皆因為金沢既觀光點,集中晒响車站既東口一帶
黎到金沢趁天黑前要去既觀光點係"ひがし茶屋町",所以急急腳咁走出車站
同京都一樣,金沢既觀光巴士可以買一日PASS
觀光巴士就係由呢3架分別行駛既,不過我會稱呢架係"傻巴士"
皆因為全程單方向,單程行車,一共有19個車站
如果要由出發既JR站去最後段既車站,咁可能行路去仲會快d
呢日黃昏先到埗金沢,好勉強咁只可以去到一個景點
(真係行慢幾步都天黑呀!)
呢架觀光車既尾班車係18:41會返到JR站,所以呢一日都係唔會用到呢張一日pass
如果唔係用pass,咁坐呢架觀光巴士既收費係每程200yen
而我就係要由下圖"0"車站去到"6"車站,話好遠又唔算,話近就更加唔係
之前上網睇過,呢段距離徒步既話,大約要30分鐘
結果出左JR車站,見唔到有呢架觀光巴士,要等車呀?!
等得黎咁容乜易仲耐過自己行去,仲要俾車錢架喎......
200yen唔係多,不過坐左架特急JR,早左少少黎到金沢
我唔想結果係無無聊聊咁乜都做唔到
其實肯定仲有其他巴士會途經呢條"茶屋街"一帶,不過我已經無時間再慢慢去問人,去研究
結果就係把心一橫"信自己"好過
我行路去
膽粗粗咁睇住個地圖,數住地圖上既交通燈位,路口位....咁就行路去
其實沿途都有呢d指示牌,留心少少既話都唔會迷路既
行左大約30分鐘就到喇,好彩都仲未天黑,仲可以影到相 
呢條古老舊街咁有特色,响白天時呢度係相當多遊客既
只有响黃昏時間先會有咁寧靜既一面
呢條街俾人既感覺真係同京都幾似 
揀啱呢個時間黎,絕對係錯有錯着,實在係寧靜得令到呢度顯得更美
幾自由,任影都無人"邪魔 した"(阻住晒!)
京都同金沢既古老舊街既歷史,都係同藝妓有關連既
所以呢度d屋都比較注重外表,同高山既"平民化"唔一樣
我諗高山嗰d鄉下田野地區,唔會有藝妓卦?
明知翌日會落雨,可能無乜機會再影到似樣d既相
結果就响呢度hea到天黑先走,依依不捨......
天色越暗,越有古都氣氛
呢一日黎到金沢仲可以觀光,總算係彌補返响立山黑部運吉既感覺
呢一日都叫做係有d收穫啦!
對金沢有高評價既另一個原因係-食
金沢有好出名既海產,只係呢一樣野都夠吸引我
响金沢最有名既魚市場係"近江町",不過呢d魚市場係早開(檔)早收(檔)
所以要大快朵頤既話,就要等翌日喇!
不過對食有要求既我,一早就响網上搵埋是日晚餐要食乜?
近江町市場既魚生就係下午收市
不過响金沢車站呢個商場入面既超級市場,就有一間"魚河岸"既小檔口
佢既總店就係近江町市場入面既魚檔
只係呢個來頭都已經令我相信佢有品質保證
好似响松本一樣,呢d刺身既價錢係~抵 
598yen,398yen,全部都係半價,簡直要用心花怒放黎形容當時既心情
因為呢度係魚產出名既金沢,我就更加相信呢d係好品質
所以繼續買返酒店做我既"野人晚餐"
當然仲有每日都要食既5色蔬菜
之前既行程响荒山野嶺,所以都唔期望可以"每日一cake"
本來諗住黎到金沢呢個城市可以解禁喇卦,响車站既商場行左一陣,的確係有蛋糕店/咖啡店
不過就遇唔到令我一見傾心既蛋糕,靚蛋糕都仲係去晒東京,大阪
(金沢唔係只有呢d蛋糕卷,而呢張只係可以偷影到既唯一一張蛋糕相)
最後就決定慳返呢500yen 
是晚無甜品食
是晚無甜品食順便算係懲罰一下自己之前响富山時,神智不清咁上錯特急車....
要對自己嚴厲d,咁先會好好記住呢件蠢事,等自己永無相同既錯
結果係慳左來回程既觀光巴士錢,又慳左蛋糕錢
咁都差唔多可以抵銷返坐JR特急車既補錢差價,咁仲可以响茶屋町影埋靚相
呢次的確係"錯有錯着"
唔食甜品,但都有零食黎睇電視喎.....
下面呢枝"はっ酵乳"絕對係我宜家去日本時好有興趣買黎飲既奶品類 
呢個係稠身既乳酸飲品
第一次响函館空港飲過之後,一飲就愛上它,實在係好濃奶味
不過都唔係每一隻牌子都咁濃味,而响金沢買到呢枝就相當美味
沒有留言:
張貼留言