小甜甜响我心目中係無可取代最愛既卡通片
甜甜的確係觸動左好多同我同年代既女孩子心事
上網搜尋關於小甜甜呢套戲,就會發現好多人同我一樣---為甜甜而傾心
仲會响youtube上搵到唔同國家版本配音既小甜甜
可想而知甜甜既魅力幾咁厲害
雖然上網都可以睇返全套戲,但最愛既甜甜一定係成為我既收藏之物
所以都係買左呢套DVD,再次睇返當年既戲,心情會有咩唔同呢?
當年我只係一個小學生......宜家我係一個"中女"......
用小女孩既角度,同中女既角度再去睇小甜甜,到底會有乜分別呢?
孤兒院長大既甜甜,心地善良,活潑開朗,勇敢堅強
宜家睇返童年時既甜甜,為左唔想同安妮分開
佢點都唔想俾人收養,但安妮就好想有爸爸媽媽既愛鍚
因為咁佢地兩個仲拗交.....呢個小甜甜實在係太固執都唔識體諒安妮
童年既甜甜唔係幾可愛
但到左安妮俾人收養時,甜甜都仲係真心祝福安妮
甜甜既人生路上遇上唔少波折,離開孤兒院並唔係俾人收養成為女兒
而係去左富有人家,作為惡毒富家女"伊麗莎"
既玩伴
佢從頭至尾伊麗莎都妒忌甜甜
為左要除去甜甜,佢用盡方法留難,結果甜甜被賣去南美洲
幾經波折之下,俾阿得雷家既威廉爺爺收養成為養女
不過無風無浪既日子並無因而消失
甜甜鐘意過既三個男子,其中兩個都令佢傷心不已
呢一d感情線就令到當時既小女孩觀眾們跟住甜甜一齊開心,又一齊喊
6歲時遇到"山丘上既王子"
後來遇到同"山岳上既王子"好似樣既安東尼
結果安東尼因為意外墜馬而死......
當年既我唔係咁鐘意安東尼,我嫌佢太柔弱,少左男子應該有既陽剛氣慨
宜家再睇返都係呢個想法
响倫敦讀書時遇上不覊既狄李斯
情敵蘇姍娜為左救狄李斯而變成殘癈,為左責任,狄李斯決定放棄甜甜.....
呢三個甜甜喜歡既人當中
當年我最鐘意都係狄李斯,鐘意佢不覊但對感情專一
不過宜家再睇返就唔係喇,我覺得佢d行為粗魯,唔成熟,仲無黎風度
完全唔似係出身英國既貴族
懶以為自己有型咁為左蘇姍娜變成殘癈既事,而決心放棄甜甜
結果最後就只係離開劇團,放棄自己既夢想而變成生活頹廢既人....無鬼用!
那邊廂甜甜同狄李斯被迫要分開何嘗唔係好傷心
但甜甜仲係好堅强咁繼續堅持自己既理想,努力咁生活
好彩當時有失左憶既歐拔先生
响甜甜身邊安慰同支持佢
宜家睇返就覺得狄李斯咁唔成熟,根本都配唔起甜甜
宜家再睇返,我最鐘意係歐拔先生
由甜甜做左伊麗莎既玩伴開始,甜甜一直俾伊麗莎"兩兄妹"蝦"佢
但每次遇到危難或者傷心事之時,歐拔先生就會出現响甜甜身邊安慰佢
尤其係同狄李斯分開之時,甜甜傷心不已.....
當時因為歐拔先生失左憶,甜甜為左可以照顧佢而兩個人同住一齊
以往歐拔先生只會係曇花一現咁响甜甜身邊出現
但自從佢地兩個人同住一齊時,甜甜都不自覺咁响歐拔先生既守護之下
心靈上多左依靠,之後每遇到唔開心或者驚恐既事
甜甜一見到歐拔先生就會忍唔住咁攬住歐拔先生黎喊
其實女孩子就係想有呢份安全感,想有人會保護自己
當歐拔先生回復記憶之後,又再次離開甜甜
甜甜為自己又再孤單一個人而感到傷心難過
其實歐拔先生既真正身份係威廉爺爺(收養甜甜為養女既人)
後來歐拔先生終於都要揭露威廉爺爺既身份
由收養左甜甜之後,歐拔先生一直响甜甜身邊守護佢<---冧死人喇!
安東尼係歐拔先生既外甥,响安東尼墮馬死左之後
歐拔先生除左有出現黎安慰甜甜之外,仲安排甜甜去倫敦讀書
離開美國呢個傷心地,等甜甜可以盡快忘記安東尼既事
歐拔先生都離開左美國去到倫敦,响一間動物園打工
其實目的就係繼續守護住甜甜
直到甜甜遇到狄李斯之後,歐拔先生知道可以將甜甜交俾狄李斯
歐拔先生就決定離開倫敦,去到非洲做佢最鐘意既動物工作
直到歐洲開始打仗,歐拔先生遇到意外事故而失憶
咁甜甜同歐拔先生先發展出微妙感情
宜家問我,劇中最愛既咁一定係歐拔先生
佢個樣比起狄李斯,一d都唔輸蝕,而且既溫柔,成熟世故,正直,又有男子氣慨
唔同年紀既思想果然係唔一樣,細路女時代既我都只係睇表面既野....
呢套戲除左講甜甜既少女感情事之外
其實甜甜既樂觀同堅強既個性,都係呢套戲想傳遞既訊息
甜甜既人生路一d都唔平坦,但佢就一直都靠自己既意志走自己既人生
遇過無數傷心挫折既事,最後都係會修成正果
不過原來歐拔先生就係甜甜响6歲既時候,响山丘遇上既王子
呢個王子就係甜甜既初戀心上人....
沒有留言:
張貼留言