9月7日(星期二),長野縣立山黑部,大致天陰
間中有陽光
東橫 inn响朝早7點
開始提供早餐 
開始提供早餐
而我响06:40已經可以行出酒店睇下附近既環境
今次我絕對係旋風式咁略過松本 
食完早餐就拿拿林出發,要搭07:48既JR去信濃大町站
呢一日既行程係立山黑部,响唔同季節都有唔同風景
登山路線既公共交通工具係有期限行駛,由春天4月17日至11月30日
下面4個唔同景色既海報,其實對我黎講係無乜被吸引既感受
真雪 
同紅葉 
都已經見過
同紅葉 都已經見過
如果係綠油油既山景,咁上高地就靚過佢好多.....
咁做咩要黎立山黑部呢?..........咪就係因為"順便"囉!
不過呢個"順路"就係相當豪亦都係相當奢侈
由信濃大町開始乘坐立山黑部既交通工具去到立山駅,一共係9390 yen
覺得佢奢侈既最大原因係呢度遊覽既模式唔係幾啱我
燒銀紙之一日行程終於開始...........
都因為無法對佢產生好感,所以是日行程都幾悶蛋 
當時係悶蛋咁玩 
宜家就係悶蛋咁寫返出黎
宜家就係悶蛋咁寫返出黎
全日本都有JR,不過每區既JR都各有特色
今次坐既"大系線"既特式係電車門---開門係要乘客按掣先會開
落車想開門,都一樣要按掣 
中途站上車既話就要攞整理劵
JR普通電車應該係站站停,但呢架係月台無人等車就會飛站
大約坐左一個鐘頭既電車就到"信濃大町站"
呢個車站一睇就知係經過悉心打扮 
完全係刻意打造成一個旅遊觀光區
再轉巴士去扇沢,40分鐘車程就要1330yen,真係貴得緊要 
其實"扇沢駅"同"日向山高原"唔係相相距好遠,但車費就相差好大
擺明係"劏人"
黎到扇沢就係落車買立山黑部既票
全程都係用呢張票,而且係5日有效
出發之前上網睇d人去立山黑部玩
無見到有人認為一日玩完立山黑部係只有一個"趕"字
所以搞到我都以為花一日時間都可以.....的確係可以,在乎要求d乜
我都忘記左
自己並唔鐘意走馬看花式既旅行
結果咁樣趕法,搞到我對呢個地方完全無好感
我記憶中既立山黑部,只係不停地睇住時間趕車,上車,落車,轉車
不過宜家諗返轉頭,即使當時係安排响呢度泊宿一晚(咁就唔會咁趕)
我都一樣係唔會鐘意呢個地方,如果講風景,真係唔及上高地既靚
又因為要轉車,所以身邊成日都有一大堆人,我係有"人多聚集恐懼症"架嘛!
所以當轉車已經係轉到麻木左時 
我個心已經想早走早着
結論係用9390 yen就係為左坐唔同既車......仲要係坐到無晒癮為止
不過呢次都因為係不斷有車接駁每個位置
所以即使我搵唔到托運服務預先托個"細仔"(背囊)去立山駅等我
局住要我全程都揹住佢 
咁就當係幫我慳左少少托運行李費用
响立山黑部觀光既話,春天係可以睇"雪墻"
夏天就係睇水霸,秋天紅葉期既話,當然係睇紅葉啦!
咁已經係三個季節既開放時間都有野睇,保証一定有遊客
所以呢個水霸既噴水時間似係一項表演,繼續吸引遊客去觀光
呢個絕對係一個"無綽頭之中既綽頭",我就唔係幾欣賞喇! 
行程初段還可以,厭惡既心情係比較後段先出現
立山黑部既行程就由扇沢開始 
由扇沢去黑部ダム係以"関電トンネルトロリーバス"黎行駛
佢既特色係用電黎行駛,所以車頂有電纜,咁就唔會污染環境
但其實佢同坐巴士係無分別
呢一程由扇沢至黒部ドム,車程大約係16分鐘,車係响隧道入面行走
呢架"関電トンネルトロリーバス"都可能係呢度既"自慢之車"
連手信都有佢一份,仲係限量發行,今年係120000架
平均每日要賣出238架.........咁多?得唔得呀?!
雖然一話係限定版就即刻會身價提升,當日所見就無人有購買意慾
但呢個身兼任推銷既站員就比呢架車吸引好多喇!
d お婆さん見到佢咁落力推銷,不知幾開心 
有片為証架!
果然係異性相吸
短片中既白色風褸お爺さん就睬佢都戇
其實佢响空檔時間唔止係賣呢架車,仲要幫手推便當出黎賣
一人分飾幾個角色,難得佢仲咁"元氣"
呢d都係傳統日本零售服務業既要求水準
沒有留言:
張貼留言