2010年一個人日本之旅-DAY 2@長野縣-茹毛飲血在松本

 

9月6日(星期一),長野縣松本市,夜

 

 

離開上高地之後,當晚係要响松本過一晚 

到達松本已經係天黑晒   下面呢d咁光猛既照片係翌日拍攝

 

松本呢個景,好似札幌d民居車站 望到盡頭不遠處就係山

總係覺得可以生活响呢d地方應該會幾舒服

 

今次繼續都係住東橫inn,又係4樓,仲啱啱對正隔離幢大廈

我响東橫inn最高層數都只係住過5樓,而4樓仲住過好幾次

唔通4,5樓就係單人房層數

房間既窗外情況都只係"樓對樓",其實中間大約都有2米既距離

不至於好似我上次响札幌住package酒店時

"樓貼樓"到要用圖畫顏色貼紙黎貼晒d玻璃窗,搞到間房絕對適合"開壇作法"

其實經過上次响札幌訂過咁劣既package酒店之後

宜家都唔想買機票+酒店既package,確實係有恐懼症

唔想再俾人迫我住柴房/ 黑房 / 迷離走廊既頭房尾房....

繼續幫襯東橫inn都係因為我熟知佢地格局,咁會安心d

鐘意佢地走廊夠光猛,白天時會有天然光照入室內,陽氣夠晒盛 

 就算住頭房/尾房都唔怕

我好憎d酒店走廊搞到好似"黃色架部"咁昏昏暗暗 

方便招魂咩?

 

要知道d"日本土產貞子"有幾嚇人先得架!

 

松本既名物係馬肉剌身  响呢度好易搵到食店食呢樣野

其實日本其他地方都可以食到馬肉

咁當然响松本係會抵食又新鮮啦,呢個都係我今次對松本既唯一期望

以我得天獨厚咁擁有"逆來順受既腸胃",咁當然係要好好地配合佢啦

有機會就要食盡天下間美食喇!

 

松本呢度好多居酒屋都打正招牌有馬刺し,酒店附近都有一間

不過又係因為一個人食飯會有d 寂しい

更何況日本既居酒屋係可以吸煙既

一群一群煙民聚集一齊黎吸煙,我呢個"乾淨肺人"又點會忍到呢?

所以都係要搵一間比較少d廢氣 先食得舒服

 

結果响日本食評網站搵到呢間地道家庭式食店

呢間細細間,閉店時間係8:30pm,咁睇黎呢間似係純粹食飯

是晚全店只有3枱食客,合共5個人(包括埋我架喇)

如果唔係之前睇左飲食網站既評分,我諗响外面經過呢間食店

都唔會諗要入去幫趁,事實上佢地係"家庭式"經營既格局

外地遊客點會垂青呢d其貌不揚既小店呢?

經過呢一次我反而鐘意呢d有人情味既小店 

不過都仲係要有實力先係最重要,我情迷"真材實料"有內涵

下面相片右邊既似係老闆娘喇卦

佢知道我唔係日本人之後,就估我係中國人

而我就再仔細補充係:"中国の香港です"

如果宜家去到日本,都唔知應唔應該提及自己係中國人?

不過响一d日本人心目中,香港 = 中國

小店係賣貼心真誠服務 ,老闆娘對我呢個外地人都相當親切

佢最關心既當然係我對第一次食馬刺身既食後感啦!

睇得出老闆娘對呢個松本名物係相當咁"自慢" 

 

我注文左一客普遍份量既"馬刺し",盛惠900 yen(唔貴喎!)

其實仲可以揀跟飯,半碗飯加100 yen,一碗就加200yen

 

主角出場.... 完全係茹毛飲血野人feel.....好有挑戰性呀! 

 

呢次並唔係我第一次食紅肉刺身,以前都食過松阪牛刺身,鯨魚刺身

當中以食馬肉刺身係最有"野人feel"

平日食牛都唔會食全熟,所以對於生牛肉都不至於係太陌生地抗拒

而鯨魚因為係海洋生物,雖然佢係哺乳類,但感覺上點都覺得佢係魚

而鯨魚無一般紅肉既質感,所以並無"野人feel"

 

而馬肉唔係平常會食既肉,而仲要係生食

咁真係幾有"茹毛飲血"既感覺......到底馬刺身係乜口感?乜味既呢?

 

咪就係有馬既味囉.......呢個答案擺明係"行貨+影射" 

實際上呢......質感好軟(比松阪牛刺身仲軟)

有d人話馬刺身有腥味,不過我就食唔出有腥味,都無肉既羶味

如果跟飯一齊食,應該心理上會容易d接受

其實最初一啖一啖咁將生肉放入口時,的確係有少少抗拒架

不過食左1/3就接受左,食完之後仲有d掛住呢d馬刺し 

呢個表現証明我有d愛上佢喇 

所以下次為左要食佢

我會再黎松本,兼且仲要發掘呢度可以觀光既一面

呢d平,靚,正既食物,不應錯過!

 

 

响上高地勞動左一日,一客馬刺し點可能令我滿足呢?!

去到日本食晚飯通常都係外賣,所以超市或者百貨公司既刺身就係我既首選

而去到呢d細城市,真係會令人喜出望外咁興奮

時間係晚上7點,百貨公司既刺身由原價698yen減到350yen 

仲要唔係賣剩貨尾,呢個價錢响東京,大阪真係唔可能 

買返酒店慢慢歎  繼續茹毛飲血做"野人"

雖然係半價,但都仲係新鮮 

 

連蔬菜都係食生既沙律,繼續做野人,沙律都減價30%

呢日都一定有食到"五色蔬果"既健康標準啦

 

飯後甜品係donut,皆因為呢間東橫inn隔離就係Mr. Donut

完全係無藉口唔買黎食

 

是日無懼增磅既可能性,皆因行左一日山,我儲左好多"食的quota"

 

雖然呢次只係過路松本 但係我對呢個地方既印象唔差

其實只要食到好野,我就會加好多印象分

呢次全賴有松本馬刺し做"殺手諫"

松本---