一見鍾情之地

 

呢幾年黎,我一個人去左日本4次 

一個人去日本係越玩越上癮

宜家去日本多個人我都會嫌"駝手lung腳麻鬼煩"

其實我好享受嗰種一個人去到日本,將香港既事全部暫時洗腦既感覺

如果有個朋友全程响隔離同我係咁講廣東話(話題依然係香港既是是非非)

咁我個心咪一樣無離開過香港,我唔要咁樣....

所以今後去日本都係自己一個人好玩

 

呢4次一個人去日本既目的地都有主角同配角之分

呢d主角全部都係曾經同我發生過"觸電式既愛情" 

 

一見鐘情咁令我深深迷戀上佢地

咁我先會入晒迷,中左邪咁要去會"情郎"

又唔好以為我d感情好泛濫喎,其實我要求好高,寧缺勿濫係我既忠旨

曾經令我意亂情迷既地方分別只有4個白川鄉,倉敷,函館,上高地

只係得咁多咋,我都算專一喇卦!

 

情郎1號白川鄉

 

情郎2號倉敷

 

情郎3號函館

 

情郎4號上高地

 

以上排名係按照同佢地邂逅既時間,號數越前,當然就係感情越舊啦!

咁情郎5號又係邊個呢?

唔好意思,下一個令我有觸電感覺既情郎又仲未出現喎 ~

所以下一年應該會舊地重遊

與其要我每次搵一個未去過,但又未有feel既地方

咁我就寧願舊地重遊,旅行有時只係追求嗰種"情人眼裡出西施"既感受

簡單講係追求"質"而唔係追求"量",美景不厭百回看

好似京都咁,去10次都唔會悶,每次都會有新既體會同感受

 

啱啱去完上高地,再睇返d相時,我真係覺得呢次個行程太倉猝喇

我無好好地放慢腳步黎欣賞呢個"情郎, 残念だった! 

悔しい!

當我個心係後悔緊既時候

其實我已經計劃左一個可以重遊舊地既行程 (夠晒有效率喇卦!)

以後只要時間夾得上,就可以乜野事前準備都唔多需要(只係要訂房間)

咁執好行李就可以起程會"情郎"

如果有人對上高地呢個地方感興趣,都不妨參考一下呢個既意見

 

由東京先去松本,唔好錯過松本既名物-馬肉刺身

絕對係超正!又平,又正!

之後先去上高地,安排响上高地泊宿一宵

翌日一早就出發行山,趁遊人仲唔係太多時,要好好珍惜上高地既美景

離開上高地可以直接去高山,又或者泊宿响平湯溫泉

(我會揀後者)

之後白天入去白川鄉再泊宿一晚(必需揀入住民宿)

翌日先坐車重返大城市(東京/大阪/名古屋)

呢個安排對我黎講絕對係完美....終有一日,我會實現呢個行程

 

白川鄉既寧靜悠閑加埋上高地既靚

呢兩個"情郎"對我黎講都係咁叮噹馬頭,無分彼此地深深愛着

既然呢兩個"情郎"同樣係身在岐阜,要去幽會,咁當然兩個情郎都要見啦!