"髮豐"大和男

 

文章日期：09/16/2010 10:10 pm

以前無咩自由行經驗時,安排行程就搞到好似跟團咁

一日去幾個景點觀光,結果係趕頭趕命

疲於奔命,一d都唔享受咁樣既旅行

趕頭趕命之時,腦袋通常都係咩都諗唔到,只係記得要上車,落車.....

思想仲好似被麻目左一樣

 

所以自此之後既自由行,就一定會留返d時間俾自己可以無聊咁hea下

可以行到邊睇到邊,咁都係相當有趣既事

腳步放慢d,咁就會留意到d小事情,有d仲會相當有趣味性

 

好幾年前,我就發現大和男仕比香港男仕少出現秃頭情況

响街上所見,有秃頭情況既大多數都係上年紀既人

而且有唔少中年既大和男仕,佢地d頭髮仲係相當濃密

就算佢地出現M字額,但都仲係保留一頭濃密既頭髮

 

直到宜家我响日本坐車百無聊賴之時,我都會留意一下d "髮豐"大和男

佢地名符其實係"天生髮豐難自棄",今次有相為証添~

 

等我放大上面張相,逐忽黎睇下啦

以下係相片 1

 

再黎係相片 2

 

最後係相片3

相片中所影到三個車廂中就得一個真正秃左頭既大和男

不過佢年紀都有半百架喇~秃都係正常既事

到底點解大和男會咁"髮豐"既呢?

 

唔少香港男仕30歲都未夠就出現頭髮稀疏,或者係M字額,甚至係"秃-ing"

咁後生就咁樣,都真係相當可憐

 

咩成因引致脫髮,甚至秃頭既呢?

1.生活壓力太大      2.用太多化學成份既頭髮用品    3.食物影響

 

如果講生活壓力

城市生活既大和男人唔會比香港男人輕鬆

香港男人普遍比大和男人遲婚,理論上結婚時都應該有d經濟基礎

而香港既習俗係結左婚都仲係同老婆一齊返工

一齊負責屋企開支

反觀大和太太們通常都早婚(咁即係結婚前唔慌有好多私己錢)

好多大和女子結婚後就全職做家庭主婦,屋企既開支就靠老公出外拼摶

大和男人好彩既話就搵到一份終身制既長工

否則就只會係一個福利相差好遠既合約員工

甚至係做"特派員"(合約期係更短,仲係以時薪計算工資)

如果係終身制既員工,咁就要識得耍交際手段,同公司內外既人搞好人際關係

香港就無呢支歌仔,任何人都可以隨時轉工,受氣咩,咪跳槽囉~

唔駛為左一份終身制既工作而要迫自己去巴結甲,乙,丙,丁,福,祿,壽...

我覺得如果要香港男人過大和男人呢種 SALARY MAN 既生活

怕且香港男人d頭髮會秃得仲快d 添.....

咁講法即係都可以否定一般脫髮既主要原因係黎自生活壓力大

 

咁第二個原因係用得太多化學成份既美髮用品

咁呢個就更加唔成立添啦

大和人不論男女都咁講究儀容

咁都差唔多肯定佢地响個頭上用化學品,一定多過香港男仕

(事實上都有唔少香港男人係不修篇幅,但都一樣好早就秃.....)

 

生活壓力同化學品呢兩個原因都唔成立

咁就可能係第三個原因:食物影響

大和人依然係保留住食得比較多蔬菜同海產類

而香港男仕就越食越多肉類,肉類同蔬菜類既分配甚至出現失衡

咁會唔會係呢個原因令大和男繼續係"髮豐"男

而港男就越黎越秃得早呢?

 

我除左發現大和男人係"髮豐"之外

我仲發現到大和民族既新一代,佢地男女分配仲係幾正常

但响香港BB女既出生率比BB仔既出生率係高d

身邊d家人,朋友,鄰居等,生女比生男既多

但响大和又真係無咩呢個問題架喎 

隨街都見到大和B仔,又會見到大和B女,咁到底又係咩野影響生育性別架呢?

呢個我就更相信係食物影響

 

 

跟據曾經响巴西工作過既家人所講,巴西人既男女失衡現象係相當嚴重既

一夫配三妻並唔係奇怪既事,而巴西人又確實係食肉獸黎既

咁講法問題可能真係出於食物上喎~

大和人都仲係蔬菜,肉類,魚類都算係均衡

話晒佢地都係食唔少既海產,並唔係一面倒咁食好多豬,牛,雞

咁樣諗諗下,可能真係有d理論係啱喎!