日清烏冬+生拉麵

自從參觀完日清拉麵發明館之後,我話過要支持日清企業,多D幫趁

所以上次由大阪回程返香港之前,已經坐言起行,講得出~都做得到

 

其實响日本逛大超級市場,係我每次去日本必做既"大切な事だ"

仲要係好仔細咁行,咩都好仔細咁睇(只係食物咋)

呢個完全係十分享受既活動

 

"友人"會响日本抬杯麵返香港,我以前都會買杯麵

其實呢d杯麵香港都好易買到,只不過係價錢貴40%以上

不過杯麵又唔環保,又"亞"行李,放幾個杯麵就會塞爆個行李架喇!

所以又係唔多啱我呢d次次上機都行李過重既人,我仲有好多野要買架嘛!

 

杯麵香港都有,如果要食,响香港買黎食就算喇,最多俾多錢人賺架遮!

話晒我張機票咪仲貴,寄艙行李每1 kg都好值錢架喎

仲要咁辛苦親自速遞送返香港,都係抬d 珍貴d既野會值得d

 

上次响大阪一間大超市睇中左呢3個日清麵

每一包都係2人前,呢度3包,夠6個人份量喇!

如果買6個杯麵就肯定塞爆我個行李咯!

 

呢個係要保持冷藏既食品,所以我係用外賣魚生,蛋糕既保冷冰

仲用埋個保冷袋,臨出發去機場前先包好佢地,帶佢地黎香港

呢3個日清面(咖哩烏冬一個,生拉麵兩個)好味到不得了

嗰種味道真係好似响日本d舖頭食緊拉麵咁

唯一唔好就係保存期得兩個星期左右

唔知香港買唔買到呢?

不過保存期得咁短,都應該香港買唔到架喇!(完全自我安慰)

 

下次再去日本時,應該會出其他新口味,我會繼續支持日清架!