雜耍做Pizza?

其實我一直都唔係好明,點解d人話pizza係令人致肥既食物?

因為佢有芝士?

但醫生都建議人食芝士,因為可以吸收鈣質嘛!

小朋友小食時食芝士好過食埋d無益零食添!

 

pizza如果home-made既話,我就係用橄欖油,已經比較健康啦!

pizza有肉,有菜,有五穀類,點講都好過去食個"牛/豬/雞排餐"卦?

咁點解pizza會食肥人,唔通"牛/豬/雞排餐"唔會咩?

真係百思不得其解既~

 

其實我幾鍾意home-made pizza架,連pizza既麵包底都係自己搓埋

餡又可以自己揀舖咩都得,可以多粟米,多磨菇,少肉,但芝士就無需刻意減少

所以次次都會做左一個super pizza焗完出黎既高度由頂至底可以係5cm 高

我唔太鐘意出面食肆嗰d底厚,餡少又多油既pizza

所以自己做先係最合心意

 

除左唔明點解pizza會係致肥元兇之外

更加唔明白點解搓pizza個麵包底時要拋高個pizza皮?

 

以前有一間連鎖式既pizza既快餐店

舖頭門面一定係一個玻璃箱,入面就係班師傅仔响度表演拋pizza

pizza個麵包底响舖餡料之前,就一定係將個pizza底拋到半天咁高

諗諗下都有d唔衛生,無必要咁樣耍雜技遮?

 

就係因為呢間舖頭,以前我一直都以為做pizza係要將個pizza底黎拋既

但自從識搓麵包之後,我就懷疑緊自己係咪被騙左好多年呢?

我自己做時,咪當佢係普通做麵包咁搓,無拋過,咁咪一樣係好好味道!