9月25日,全日天晴
黎大阪係為左食同shopping
响大阪食同shopping最方便既地方,莫過於係心齋橋,道頓崛,難波一帶
呢度係心齋橋既地標 
响大阪自由行4次,我都係第一次响呢度留影架咋
唔知點解以前無呢個意圖,但今次又有既呢?
响戎橋就一定會見到呢個佛+企鵝
日本人除左對雪糕係特別鐘意之外
(d景點多數都有雪糕賣)
其次,佢地對摩天輪又係好鐘意咁樣,好多景點都有呢樣野
好可愛既食店門面
呢幾年日本吹韓風都吹得好勁
打開大阪旅遊天書
都必定有一d例牌食店係推介俾人必去食既
好唔好食就見人見致,不過既然都黎到大阪,都應該要食啦
かに道樂--蟹宴
就係為左呢隻日本蟹搞到我响北海道時都掙扎左好一陣子
响北海道食就真係貴d,但唔見得"貴有所值"喎!咪同大阪呢隻差唔多
づぼらや--河豚
d人冒住會中劇毒既可能都要食佢
咁黎到大阪當然又係唔好錯過啦!雖然並唔覺得佢係咁極品好食...
題外話一則
話說"友人"曾經食河豚食到嘔,唔係因為味道難入口
而係因為d河豚既皮好似橡根咁厚,又韌,食到佢要扣喉咁嘔返出黎
"友人"仲唔black list呢d河豚咩?!
自由軒--咖哩飯
呢度食野,視覺享受比味覺享受為高
响呢間老舖食店,全部服務生都係嬸嬸,仲有長期坐收銀位既"面白い"白面老闆娘
呢個情景絕對係"おもしろい/面白い"
相當有趣
相當有趣
松阪牛
雖然我始終覺得神戶牛先係和牛中最好味,最入口即溶
不過松阪牛都有佢既特色,就係可以刺身咁食,如果接受到食生牛肝,咁更加唔好錯過松阪牛肝
金龍拉麵
個人認為無乜特別,但本本旅遊天書都推介,佢最有特色咪就係"日式大牌檔"囉!至於味道就....
以上全部食店都無列入我呢次行程中,黎過大阪咁多次
旅遊天書介紹既食店,會去食既都去左,無興趣去既,都應該係唔會去
從來都無提過我响日本係點解決晚餐問題
因為一個人去旅行,晚餐去食店既話
見到其他人都係同朋友一齊,咁相比之下就真係會食得有d"寂しい"(寂寞)
再加上從來晚餐都有只食6-7成飽既習慣
咁就真係唔知一個人外食可以食乜添?
所以响日本既晚餐,絕大多數都係外賣沙律+美味既剌身+最愛既甜品
宜家望返都流晒口水添!
不過我會開始戒食三文魚刺身架喇!我一直都知生既三文魚會食到生蟲
所以d連鎖壽司店賣到割價$3一碟,係從來都唔會吸引到我食既
不過我以為日本本土出品會安全d,但嗰日聽"菜欄"响電視度講
連日本人都因為三文魚會食到生蟲,同埋三文魚既顏色唔係天然顏色
所以日本人都唔多食三文魚刺身
我當唐
我當唐
重溫蔡瀾先生既"唔食生三文魚既原因",請Click及由36mins開始收看
下面呢d全部都係今次行程中,晚餐時食落肚既甜品
仲未計白天觀光時,沿途食過嗰d甜品,大阪既美味布甸仲要係 x 5個添
原來食左咁多(總數係21件),唔怪得之會咁啦!
習慣晚餐唔會食飽,咁唯有午餐時食飽d (嗅多d米氣)
响函館時,日日食魚生丼都唔厭
黎到大阪之後,魚生丼仲係無離開過我架啵!
响"千日前"就有一間細細間食魚生丼既食店
就係呢間"若狹家",頂頭個招牌都好易認啦!
2008年同朋友一齊去大阪,亂打亂撞之下就俾我地發現呢間"正"野
上面呢個就係我最愛既配搭:海膽+大魚子+吞拿魚茸
由賣相,顔色,口感至味道都係襯到天衣無縫咁完美
响北海道食魚生丼,都比較少見有吞拿魚,到底點解呢
我呢個"若狹家"既3色魚生丼,普通size 1260 yen
(魚生種類唔同,價錢都唔同)
飯既份量比函館"きくよ食堂"少d,但一般女仔食就唔多唔少,啱啱好
(特別食得同特別細食既女仕就除外)
下面呢個就係函館""きくよ食堂"既set,魚生份量好似係"きくよ食堂"多少少
但"きくよ食堂"又貴"若狹家"少少喎,所以打和!
至於味道都食唔出有咩分別,總之就係一個字:"正"
响香港可以食到呢d質素既魚生,已經唔係d平價食店
黎到日本可以用呢d大眾化價錢就食到呢d好野,實在係好心足架喇!
随分幸せだった!
呢間"若狹屋"都有綽頭野搞下喎~
15分鐘內一個人可以食晒びっくり丼"(包括1公升飯+一砵8分滿既味增汁)
咁可以免費(原價係3980 yen)
唔知"大胃王~小林尊"掂唔掂呢? 1公升飯到底有幾多呢?
講完响大阪食,咁都應該要講埋shopping
香港人去日本都好有興趣去outlet shopping
事實又係,日本潮流轉得咁快,就算擺左去outlet度賣既貨
响我地心目中其實都唔係好舊
而大阪"鶴見"仲係我次次去大阪既必去之地
坐"長崛鶴見綠地線"去到尾站"門真南"
3號出口徒步直達
呢個車站有幾特別既設備
就係有為單車而設既斜路設計
上一次2008年去大阪時,仲未係電動化
但今次去就見到電動化左喇~
落,係輕鬆既動作,唔洗電動化啦!
上,就吃力好多,電動化會好d
宜家由一條斜路變左做一條電動運輸帶
牆上仲貼有說明指示
好奇咁見d人咁輕鬆咁推單車上地面
又見到呢d掣.係咪要用先要"襟"掣,咁先會開動架呢 
又會唔會係地下突出黎嗰"舊野"係自動感應器呢
呢個車站出口令我相當咁好奇
出左車站行幾分鐘就到大阪鶴見outlet
呢間outlet响平日都有人氣黎買野架
咪就係好野先有人氣囉!
呢度主要賣既都係casual wear, sports wear既牌子
黎呢度shopping唔係只啱女仕們
大阪有4個outlet,除左近關西機場嗰個我未去過之外
其餘3個都拜訪過喇,以"大阪鶴見"呢個係最吸引
是日午餐都係响呢度搞掂,無咩特色美味既食店可以介紹
不過呢間食店既名就幾有趣--你好亭!
好明顯呢間係食中華料理啦!
沒有留言:
張貼留言