一個人浪盪日本2009-Day 16@大阪(最終回)

 

 

9月24日,早上天晴

 

 

呢一日終於都踏上歸途喇!

玩左15日,都夠晒皮囉,所以呢一次無依依不捨咁離開

(其實已經開始諗緊下一個行程,都無謂眷戀舊事,舊既唔走,新既點黎呀?)

 

呢一日係早機10:55起飛 ,所以09:00左右要去到關西機場check-in

由民宿出機場大約要90分鐘,所以一早就要起身出發

07:30就要離開民宿,唔想打搞民宿太太提早為我準備早餐

所以是日早餐就係隔夜既mister donut(前一晚買定放左响雪柜架喇!)

隔夜都好味,雪凍左都唔硬,仲係軟既,正!

(Mister Donut,要同你暫別一陣喇 下次再黎一定會再搵你架!)

 

回程中最辛苦既事就係搬行李

由民宿出發無shuttle bus直達機場,咁又係坐地下鐵

好彩呢一日係星期日

所以一早坐地下鐵去關西機場都唔駛同サラリー‐マン(salary man)一齊迫地鐵

仲有心情响車廂度影低呢d 咁可愛既告示

 

其實响日本坐車時,我會好留意佢地d告示

下面呢張係京都巴士車廂既告示

 

呢一張就係札幌地下鐵既告示

 

今次全程坐ANA,其實我係ANA既FANS

航班時間合適既話,首選一定係

 

我鐘意日本飛香港既ANA用細機,窗口位一定係2座位

如果同朋友一齊坐,唔怕旁邊搭多個陌生人,被迫齊齊坐3座位

如果一個人時,旁邊個位無人坐,就會好free

回程呢一日就係乘客唔多,所以一個人霸晒兩座位

 

仲有一樣野係我鍾意坐ANA既原因~

飛機起飛同降落時,機頭同機身底部都裝有鏡頭

乘客可以用"公家"螢光幕,睇到飛機响跑道上準備起飛前直到完全離地

同降落前响半空直到安全停泊停機坪,去到接駁既閘口為止

(如果係天黑時,會見到跑道閃住導航燈指示降落跑道既正確位置)

我次次都好全神貫注咁睇,百看不厭

等自己可以感受一下做機師時既視野嘛!

 

今次由大阪飛返香港既飛機,竟然有獨立電視,有進步喎!

以前係飛東京既航班先有獨立電視架咋

 

飛機餐都係ANA既最好味,特別係由日本出發嗰一程

因為隔離無人坐,做咩都唔怕俾人笑,所以即刻有個傻婆顯露出"大鄉里"本色

連飛機餐都狂影,好似成世人第一次坐飛機咁,真係失禮! 

(去程飛東京時,全機滿席,又見無人好似我咁影自己個飛機餐,我就無影到喇!)

 

旅途中最後一個飛機餐都令人回味,真係要同ANA講一聲~

 

去程由香港飛東京時係揀左食魚,魚就...麻麻地好味喇!

但呢一程係食豚肉(豬肉),好味好多 

我又將全個飛機餐一掃光(除左個石頭麵包之外)

 

見到呢個牛奶雞蛋布甸,又有野講喇!

 

話說2008年某月某日之後

由日本飛返香港既ANA航機上,甜品變成牛奶雞蛋布甸

ANA呢個布甸雖然唔及我响大阪食足5日既布甸好味

(無法啦,大阪呢個係極品中既極品)

但ANA呢個都唔係遜色好多,只係唔及大阪呢個咁厚身

不過一樣係美味しい!至少都拍得住我既水準 

離開日本之前,都仲可以食到一個有水準既甜品,又係要同ANA講~ 

 

飛機準時响10:55起飛

日本~ 

 

停留大阪5日,就係努力咁食同買,結果兩件事都"大有收穫"

食べすぎ(食得太多),肥左好多呀!

日日四圍去 咁多運動,最後仲要抬行李,咁都會肥左,有無搞錯?

買いすぎ(買得太多), 行李超晒重,仲要樣衰到俾ANA掛左個HEAVY牌添!

 

靜靜雞講啦~我呢件寄艙行李28.5 kg, ANA無計我over-load charges

通常d有人情味既航空公司會俾d客人5 kg走棧(即係唔多過25kg都隻眼開,隻眼閉)

所以今次ANA係可以同我計到足架!

(BLOG主,聽聞你上次坐ANA,回程行李都26.5kg啦,ANA咪又係無另外要你補錢~)

係!所以唔好老奉咁 

不過我次次行李超重都預左要補錢

只不過係佢地唔同我計,咁我咪慳返dd囉!

今次件手提行李係8.7kg,兩件加埋係37.2kg (即係大約82 lbs) 

回程返香港呢一日,唔變身做超人都唔得啦!

 

 

2009年7月,全心投入計劃呢次16日既旅行

2009年9月成行出發 

2009年10月開始寫呢個旅行遊記

2010年2月終於寫完,一共寫左39篇

換句話講,同呢一次旅行有關既事,由最初至結束,歷時7個多月

呢筆旅費,絕對值得花

佢令我由計劃行程到寫返個行程出黎時,感覺都仲係享受中

 

雖然我好似中左"日本毒"咁,自由行首選既地方,一定係日本

不過日本對我黎講只宜去旅行,去玩,去駛錢,長住既話就

   

"旅行"同"落地生根"係完全兩回事,所以我寧願選擇做一個過客

對日本繼續保留好印象既一面,即使明白呢d只係表面既野....

 

最好都係可以一年去日本兩次長旅行

每次都用半年時間去準備至回味,一個結束就啱啱可以係另一個新計劃既開始

咁就完美到極囉!

今次係我第3次一個人去日本自由行

對於一個人既旅行,各人有唔同既睇法

我認為享受擁有私人空間既人,獨立有主見既人,怕麻煩既人

佢地會較容易搵到一個人旅行既樂趣

一個人既旅行有一個人旅行既開心,結伴同行既旅行,又有另一種既開心

(如果搵到合拍既就係咯,否則....)

 

雖然話一個人去旅行,遇到開心既事會無人分享

但就係因為得一個人,咁先會响旅途上遇上萍水相逄既人

一個人影相時,一個人買野時,一個人坐車時,一個人食飯時....

好多時就係响呢d時候會遇到友善既人即使只係十數分鐘既相遇....

就係因為遇到佢地,先令旅程中加多一d窩心既回憶

凡事都係有失既時候,自然都會有得既時候

一個人既旅行經驗越多時,越會愛上呢d可以咁自由既感覺

除左係自由自在之外

可以無驚無險咁完成一個陌生地方既旅行呢d都係人生既滿足感!

 

呢次既旅行絕對係

 

今度の旅行では楽しい思い出がたくさんできた!