Golden-Go 黃金糕

黃金糕係東南食品,响某年俾"某餅店"取其好意頭名稱

咁就好輕易咁响我地中國人既新年食品市場中霸左一個位 

"某餅店"呢舊野真係難食到極

不過再難食都唔見"某餅店"會改良配方

更加唔見港大市民會停止購買呢舊咁難食既野

名符其實係"我有我難食,佢有佢照買"

我諗呢舊咁難食野應該唔係賣俾人食既.....應該係俾"神"食既

因為中國人要拜神團年,開年等等,神枱要放d好意頭既食物

所以呢舊野再難食都會有人買,消費者只係買佢個意頭

 佢個真名應該係~神枱黃金糕

唔怕生壞命,最怕改錯名 唔怕佢難食,最怕無好名

雖然話呢舊野難食,不過佢個樣又真係幾靚

(梗係啦,又有色素,又有防腐劑)

糕入面d紋理好清楚,長長咁一纖纖,似柚子d紋理

呢舊難食野既材料入面有麵粉

麵粉會令到食物變得硬身,所以佢咪可以做到咁靚既"長長咁一纖纖"囉!

到底要佢靚,定要佢好食呢?

如果要好食,咁又係要自己黎做喇!

呢舊同"某餅店"嗰舊比較,咁個樣又確實係比下去既

但呢舊絕對好味過"某餅店"嗰舊幾十倍

黃金糕既主要材料係椰汁,雞蛋,木薯粉....

木薯粉既特性係有彈性既,呢個完全無用到麵粉

(明明係要佢有煙勒既口感,點會無端端加麵粉整返硬佢架)

無加麵粉同其他不知明材料既話,入面一纖纖既紋唔係長條紋,而係Q版既洞

其實賣相都唔係差,只係唔夠人地"型仔"

(高大威猛同有纖幼既身型,始終都係宜家潮流對"靚"既標準)

不過食物係用黎食既,好味同唔會無益先係最重要

呢d意頭食品都只係滿足下d人對新一年既期望

有d人話賀年食品做得唔好,咁會衰氣衰足一年喎~

唓!我年年做黃金糕都發得起,又唔見d黃金跟住我!

嘥氣!