2009年9月22日,全日天晴
响朝市入面有幾間賣即燒海鮮既檔口成日都好旺場
雖然係大牌檔咁樣,但價錢都唔係平架,不過d人依然唔介意企响街食,呢d都係朝市既特色風味
燒一隻蟹腳,價錢都要1200-1500 YEN
(食一碗3色魚生丼都係1800yen左右咋喎!)
(食一碗3色魚生丼都係1800yen左右咋喎!)
燒海膽一隻就300YEN-500YEN,不過海膽燒熟黎食?生食先係最好味嘛!
呢隻係あわび(黑盤鮑),一隻都要1500 yen,咁話晒佢都係"鮑"
仲有東風螺,貝立帆(帶子),蝦,魷魚.....咁樣燒海鮮,其實係食海鮮既原味(鮮味)
魷魚係函館名物,但因為佢地d特式食法令我太反感+反胃
所以點都唔會食,咁就唯有諗下北海道名物--蟹
計劃北海道行程時,曾經都打算必定要响札幌食蟹
以前响大阪食過"かに道樂"既蟹宴,的確係好鮮甜既蟹,咁去到北海道都無咩理由唔食蟹卦!
响札幌有一間"蟹放題",90分鐘內任食
價錢 3675 yen起,話平又唔係平,如果值得食都唔算貴,否則又呻笨
結果我都係無响札幌食蟹放題(如果有食都已經post左出黎啦!)
事緣係响網上搵行程資料時,唔止一次見到有人食完呢個"蟹放題"之後係呻笨
平日食buffet係可以同朋友一邊傾計,一邊慢慢食,咁係享受
但食呢個蟹放題時,為左要把握時間想食到多d,食得抵d
而拆蟹又係需要時間同技術,結果佢地既食後感係一d都唔享受
90分鐘入面變左一個"專心拆蟹技工"咁,而且佢地並唔認為北海道既蟹係咁"不可以錯過"
所以結果我決定慳返D錢,無食到蟹放題喇!
黎到函館,日日响朝市出出入入,見到燒海鮮舖頭d蟹,係咁伸晒d美腿 
出黎誘惑我
出黎誘惑我又再勾起我d好奇心喇!好唔好試下呢?可能好味架喎!
其實為咩咁猶疑呢?就係因為香港既大閘蟹都一樣好鮮味,正因為我地香港都有"極品蟹"
所以我更加懷疑,北海道d蟹真係會好味過大阪食到既蟹?又仲好味過大閘蟹?係真唔係呀?
結果我都無食到燒蟹腳........好彩無食咋,如果唔係又要出示下面呢個"身份証明"
响函館都一嚐到北海道既蟹,就係是日午餐-三色魚生丼
呢個注文(order)依然係"賣非佛"--海膽+大魚子,順便食埋(熟)蟹肉啦!
睇下係咪會有驚喜先~
驚喜依然係黎自我最愛既海膽同大魚子,至於北海道蟹就......
就...
就...
就...
就...
就...
就係把鬼,邊有傳聞中咁"極品"喎!
呢個係第一個食後感,第二個食後感係:"好彩無俾錢食燒蟹腳遮!"
唔係唔好食,只係無驚喜,同我响大阪食蟹宴係差唔多,唔覺得北海道出品既蟹係咁地位崇高
(可能賣到12000 yen一隻既就真係極品卦!)
所以結論係:北海道既蟹"名過於實",又係浮誇!
北海道既蟹唔係唔好食,其實都係鮮甜,不過我唔認為北海道既蟹係咁聞名出眾
我覺得咪同我响大阪食蟹,味道咪差唔多,但價錢就貴過大阪d蟹
所以我先會評論為"浮誇",但佢並唔係"唔好食",只係"唔抵食"
食完"是日午餐"就係要同函館さん暫別既時候,(只係暫別,將來我一定會再黎函館旅行既)
見到以下呢張相,真係以為"空間轉移",我返左去祖國添!
等巴士去機場時,呢兩個日本姐姐就係咁樣踎左幾分鐘(咁耐)
我有d不能相信之下
要影低佢地d儀態唔知d男士們見到d日本姐姐咁樣,會唔會夢幻破滅呢?
其實可能係宜家踎街先係 in, 呢期興呀!
因為後來我响大阪又係見到d日本姐姐隨街踎
由函館JR站坐巴士去機場只係20分鐘車程
呢個機場同東京羽田機場比較,真係清靜好多,連d地勤姐姐都清閒好多添!
由函館去大阪,每日只有一班飛機,而呢一日又係連續5日公眾假期既第4日
有d人都已經係旅行結束要回家,所以呢班飛機一早已經係"滿席"
我都唔敢太老定,寧願早d去機場check-in,以免有咩行程航班提早或延誤
臨離開函館呢一日,先記得函館山有好出名既鮮奶,我竟然係錯過左添!
呢盒鮮奶到底有咩咁特別呢?就係佢係100%牛奶,無混入其他野
而脂肪含量,每1ml有3.8脂肪,所以特別香濃
响札幌我都錯過左飲佢地d地度鮮奶,北海道d奶製品咁出名,點可能唔試下架?!
所以响機場時,打鑼咁搵牛奶
最後响禁區買左呢一個枝--唔係鮮奶,而係乳酸奶,不過一樣係奶味香濃,正!正!正!
北海道既奶製品真係好好味!
內陸機場既禁區--就係响呢度等上機去大阪
入閘要分行數,跟晒次序,仲有規舉過羽田機場
飛機終於响14:45起飛 
去大阪
去大阪函館さん,さようなら
もう一度函館へ行くつもりで, 待ってください約束した!
再見喇,函館さん!我一定會再黎架!要等我呀!
約好左架喇!
沒有留言:
張貼留言