一個人浪盪日本2009-Day 10@函館(元町,金森赤レンガ倉庫)

 

 

 

2009年9月21日,時晴時陰  

 

 

响元町區仲有觀光點,呢個係"旧函館区公会堂",入場費 300yen

 

呢間公會堂响1910年建成,下面呢個係可以開演奏會既大堂

 

入面有晚裝可以租用黎影相,1000yen可外借20分鐘

以上相片黎官方網頁:http://www.zaidan-hakodate.com/koukaido/kou.htm

 

 

"旧北海道庁函館支庁庁舎"响1909年興建既

一樓係觀光案內所,二樓展覽左d舊相機器材,同攝影既歷史資料等

 

因為今年係函館開港150年,所以响觀光地經常會見到呢個ベロリくん

 

日本個別觀光地區d水渠蓋都做得好有心思

每次見到呢d水渠蓋,自己都當係儲閃咭既心情要影低佢黎留紀念

 

 

由元町區半山一帶既觀光區行返去海邊一帶,就係金森赤レンガ倉庫(金森紅磚倉庫)

其實我兩日都黎左呢一區,所以影到白天同晚上既景色

 

呢個係"西波止場美術館"

 

因為當時隨身無帶相機腳架,所以d相影得唔係太好

手震既相就有好多,嘥晒!

 

呢間西波止場美術館係熊啤啤美術館
一樓係入場無料,因為係出售熊啤啤產品,而二樓,三樓先係美術館,要俾入場費架!

如果係熊啤啤迷,真係要黎呢度參觀一下

 

一樓場內唔係到處都可以影相,只有响呢d留影區影相就無問題

 

d毛毛公仔係咁撻响度吸塵,似乎都會幾污糟咁喎!

 

我唔係熊啤啤迷,所以無去樓上參觀美術館

西波止場美術館網頁: http://www.hakodate-factory.com/museum/Default.htm

 

熊啤啤美術館對面就係"西波止場"

 

西波止場1樓有一間好大間既"函館海鮮市場"

响呢度買手信就最多選擇,啱晒我呢d咀刁既"百彈齋主",呢度d食品真係幾多選擇架,唔買都大開眼界

 

2樓係"函館海鮮俱樂部",即係餐廳

 

如果講食海鮮呢度當然唔及响"朝市"食咁抵

不過因為朝市d舖頭下晝就關門,所以晚飯想食海鮮既話,咁呢度都係一個好選擇

 

完全係遊客觀光區,所以夜景都寧舍靚既!

 

 

西波止場隔離就係"金森赤レンガ倉庫"(金森紅磚倉庫)

 

呢個係購物商場,仲有婚宴場地同美術館,响呢度shopping, 真係又大又集中

 

呢度原本係倉庫用途,原名係"金倉赤煉瓦倉庫"

直到昭和64年(即1975年),呢度先變成函館既觀光景點,仲改名為"金森赤レンガ倉庫"

 

呢度d夜景真係幾靚架 

 

金森赤磚倉庫: http://www.hakodate-kanemori.com/

 

 

响西波止場見到呢個雕像-"赤之靴女の子"像,當時覺得呢個雕像有點與別不同

呢個細路女有咩事跡咁犀利到要為佢整個雕像呢

 

上網查下佢底細先....原來佢係一個身世可憐既小妹妹,响日本有一首出名既童謠"赤い靴"

呢首歌既內容就係同呢個小妹妹有關既~

 

呢個女仔叫きみちゃん,1902年响靜岡出世,1歲時同媽媽黎到函館居住

之後佢媽媽為左生計要去另一個地方工作

きみちゃん就由一對美國傳教夫婦照顧,後來呢對外藉夫婦要回國

原先想帶同當時5歲既きみちゃん一齊返美國,但體弱多病既きみちゃん被斷定為唔適合長途旅程

結果呢對夫婦就將佢交俾東京一間教會既孤兒院

結果きみちゃん响9歲時因病去世

函館就係佢同親生媽媽分離後再無見面既地方

函館有一個叫"赤い靴の会"係一個關注親子家庭關係既組織

呢個雕像除左係提醒家人互愛既關係之外,仲有募捐既目的