一個人浪盪日本2009-Day 10@Lucky Pierrot+函館山

 

2009年9月21日,時晴時陰 

 

 

 

响函館除左唔可以錯過魚生丼之外

仲有一間只有函館先有既快餐店,一樣係唔可以錯過既

 

呢間就係LUCKY PIERROT (ラッキーピエロ ベイエリア)

分店都唔少,响函館連"麥當當"要讓路俾佢,函館只有4間"麥當當"

可能"麥當當"黎到函館都明白"獻醜不如藏拙"既道理卦!

 

唔知係咪因為呢幾日係公眾假期,太多遊客塞晒黎函館,我次次响唔同觀光點

經過呢間快餐店門口都見到人潮既,名符其實係"千客萬來cafe

 

 

日本既"麥當當"都係即叫即做,呢間Lucky Pierrot都係一樣

因為一朝早食左一大碗朝市既魚生丼,結果飽到3pm先想食lunch

响西波止場都有一間分店,但呢間無時無刻都咁多人

結果都係決定返酒店一轉,先再去"函館駅前店"嗰一間

我懶醒咁以為離開人多既觀光區會少d人嘛點知....

 

我行入去呢間野"注文"(order)時,佢地已經同我講食物即做需要時間,大約要30分鐘

30分鐘?!

雖然係耐,不過我有時間等

(其實咁都唔應該叫佢做快餐店,一般堂食既餐廳出菜多數都唔駛30分鐘喎!)

原先想堂食(唔想外賣),但間舖又多人

又等得耐,我費事好似霸住人地個位又唔食野咁樣衰

所以都係外賣返酒店食好d喇!

 

呢一日係"敬老の日",老人家入黎食野有優惠 ,不過我等左咁耐,連一個老人家都無見過到喎!

 

我等,等,等....足足等左40分鐘先有得食

都唔知係咪自己黑仔,之前有3個女子注文左一單"大生意"

我响等既期間,見到佢地3個人前前後後攞走左8大袋食物,真係"等佢等到我黐呆"

 先見到我個"注文"蒲頭呀!

 

响札幌"麥當當"我食左"蝦漢堡",黎到呢度我都同樣注文"蝦漢堡"黎比較一下先

 

呢張網上圖片會清楚d睇到一隻隻蝦

"麥當當"嗰個只係一片"炸蝦餅,入面有2隻原隻細蝦仔

(宜家香港"麥當當"都有得食呢個蝦包啦!Uncle麥,你足足落後人地幾世咁耐呀!)

只係呢一個賣相, Lucky Pierrot都贏一仗啦!

薯條都係好味道過"麥當當"

佢地有個粟米忌廉湯係好好好...味,creamy到有餐廳既水準

帶住一半怒氣黎食佢地d美食,食完之後終於都"怒氣"全消

佢真係有料到,咁我就唔同佢計較啦!

 

佢地d食品真係唔算貴,下面呢個"巨包"都只係780 yen,咁巨型,唔算貴啦!

 

Lucky Pierrot既網頁: http://www.luckypierrot.jp/

 

 

食左一個"慢餐"後,就即刻趕去函館纜車站


要睇夜景,只要天黑左,咁大把時間可以睇,但黃昏日落呢一刻真係得短短半個鐘左右

所以一定要早d上去霸個靚位

 

函館山

海拔334m,呢架纜車一次最多可以載125人,乘搭時間只係3分鐘

大人單程票640yen,雙程票1160yen,"乎"一聲就上到山頂,其實唔太值呢個價

不過做遊客點都要做下d指定例牌"笨動作"

要有做到笨事先可以呻笨架嘛!
.......我有豬頭身份證明架!

 

 

(網上短片)

除左坐纜車可以上到函館山之外,仲可以坐巴士添,單程360 yen (設有分段收費)

 

而我買左既"函館觀光巴士+市電"既pass

用呢張pass就可以免費坐呢架巴士來回函館山

不過呢架巴士只係傍晚先開行

如果想霸位睇日落黃昏既函館,就唔好坐呢架巴士上山

回程返落山,唔趕時間先坐啦!

9月份既函館,大約响下晝5:22分左右開始日落

所以我咪要早d趕上去搵個靚位(食西北風)囉!

 

函館山出晒名係勁大風

估唔到9月下旬既函館,白天仲維持响20度左右

但當"大地在我腳下"時,已經出動頸巾+風褸+長袖T恤

但都仲係食晒西北風,冷得我騰騰震

(據天氣報告所示,9月21日既函館係8.7度至18.7度)

唔怪得之會咁啦!

  

不過可以睇到呢個百萬元日落夜景,真係食足一個鐘頭西北風都"我願意"呀!

 

被稱為世界三大夜景既有~

 

香港

日本-函館

 

意大利-那不勒斯(或譯名為那波利或拿坡里)

 

身為香港人既我,以前的確為維多利亞港既夜景而自豪

仲覺得香港既夜景係三者中之冠

 

黎到函館之後,呢個想法終於都有所改變

睇住天色由光轉暗,由白色轉為淺藍色,寶藍色,深藍色,全黑色

地型似漏斗既函館响我眼前慢慢變成一粒鑽石,散發耀眼光芒

一直我覺得平實親切唔浮誇既函館,突然變成一粒閃亮明星

(函館さん好似由青蛙變成王子咁樣)

如果香港係明珠,咁函館一定係鑽石

 

 

函館山上既人潮同香港維港放煙花時一樣,係"賓虛"咁既既場面

越夜越凍,但越夜越多人

好多鴨仔團黎到,仲好多都係講普通話既

 

(瞬間看日落-函館) 網上短片

 

回程時用pass坐巴士落山

沿途巴士係熄燈開行,等d乘客可以睇到窗外既夜景

巴士上仲有一個女服務員跟車,佢會講解函館山既資料等

 

函館既夜景的確令我眼前一亮,同香港平分春色,各有各靚

香港夜景既美,係美得好有立體感

函館夜景既美,係美得平面化,但完全係閃閃生輝

我相信"意外驚喜"係黎自見到佢由毫不起眼而變成鑽石咁靚

 

函館山登山纜車網頁: http://www.334.co.jp/jp/

函館山巴士網頁: http://www.hotweb.or.jp/hakobus/newpage67.htm

 

 

追伸

 

雖然呢一晚未天黑已經上到函館山霸個靚位

但原來靚位係要"走鬼"既~

呢個函館既百萬元夜景,每晚都可能為d工作人員帶來百萬yen既收入

只要俾3000yen就有一張以函館夜景為背景既靚相

所以如果响函館山霸靚位影相

而附近又放置左一d攝影器材既工具

(通常未開工前,d工具係用布遮住,有相機腳架,有射燈等)

咁天未黑晒之前,d工作人員就會開檔叫"走鬼"清場

原先霸左最靚既位置都要雙手奉還俾佢地開工搵食

所以呢一次我都唔可以响同一個靚位上影到全黑既夜景

咪就係被佢地趕走囉!