一個人浪盪日本2009-Day 10@函館(元町-2)

 

 

2009年9月21日,時晴時陰 

 

 

 

因為以前函館係開放港口既關係,所以當時有唔同國藉既人旅居响函館

教堂都有齊東正教,天主教,基督教,仲係全部位於風景優美既元町區

唔通同香港一樣,d外藉人仕就住晒响背山面海既地方,佢地真係識得揀,揀d咁靚地方

 

响東正教堂側門有條樓梯,一落去就係トリック元町教会(天主教堂)

 

呢張相係响東正教堂影出去,已經見到下面既天主教堂

 

响函館係故意安排星期一先參觀教堂,因為星期日一定會係主日彌撒時間,主日崇拜時間....

咁我一定入唔到裡面慢慢參觀

 

點知呢一日天主教堂竟然都有活動,相片中綠色既臨時帳蓬就係俾d工作人員遮太陽既地方

所以今日係食閉門羹 

 

天主教堂平日通常都會開放俾人入內(有彌撒/禮儀進行,搗亂...就除外)

據神父解釋話:除左係方便教友之外,仲表示天主隨時都歡迎任何人去接近佢

但我都咁"好彩"同佢緣慳一面添!残念たっだ!(真可惜!)

 

見到呢間天主教堂個外觀,我就諗起太子道聖德肋撒堂

佢地似係同時期建成喎!

兩間教堂個模式真係好似喎!

聖德肋撒堂係响1932年建成,咁函館呢間既歷史又如何呢?

 

函館天主教堂响1876年建成,之後失火,1910年用煉瓦物再建成,之後又再失火

1924年時,將失火後燒剩既鐵筋,用石屎再做外牆黎修補,同時再加建33米高既鐘樓

 

我無估錯啦!

函館天主教堂同聖德肋撒堂係同時期既建築物

 

 

參觀左東正教,天主教,只欠基督教,函館元町區呢間係函館聖ヨハネ教会,即係聖公會

個外表好有現代感呀!

 

响天主教堂既斜路向上行,過左東正教堂就見到呢間聖公會

 

大多數日本人對西洋式古舊建築物係趨之若鶩,而呢d"潮"建築物,日本人自己都有唔少創作

所以呢間聖公會就完全無人問津,得我一個睇咋!

不過呢間聖公會不對外開放,所以即使參觀都只可以睇外觀

 

呢間聖公會响1874年建成,之後失火,到左1921年再建成,响1979年就改建成宜家呢個模樣

唔怪得知個樣咁潮啦原來係近代建築物

 

行行下仲見到有一間教會响大街度添!

不過呢度已經唔係元町既觀光區,唔知呢間又係乜教呢?唔會係"日本真理教"卦?!

我估係基督教

 

 

函館唔只有不同教派既教堂,連"外國人墓地"都有唔同國藉既"專區"

又諗得幾周到喎,長眠埋一齊都有伴又同聲同氣

咁咪無咁悶囉!

 

呢個墓地都係函館推介既觀光點,又係背山面海咁好環境

可想而知函館政府幾好客,咁厚待d外國人

今次連中國人都有專區,無"大細超"我地架!

 

响札幌"開拓之村"時,連見到假人公仔都自己嚇自己既我

點會影呢d石棺材,石墳墓入鏡頭又黎嚇自己呢!

所以呢兩張影得咁pro既相,係借用"和田義男"先生既網頁

http://wadaphoto.jp/japan/hako3.htm

 

 

响元町一帶民居見到呢個告示

譯文為:散步時「   」既話,必需要帶回家處理
為咩會咁隱晦咁用 「   」黎表示狗兒既"每日大事"呢?

日本人d觀點真係與別不同既,我地保守既事,佢地就好開放,但佢地忌諱既事

就係一般人認為非常普通既事