雪莓娘(佢退步,因為我進步)

做過咁多甜品,邊樣係最人氣高既呢?

一定係雪莓娘莫屬喇!

糯米皮+生果+忌廉+清蛋糕,呢個絕對係無法抗拒既"夢幻組合"

 

雪莓娘係好討人歡喜既甜品

不過企响賺錢角度,做雪莓娘呢盤生意並唔係咁值得做

因為利潤唔可以mark得太高,但功夫就多得緊要

所以响香港都唔係好多地方會買到,暫時我所知道係得"A-溫"餅店

另一間就係太子花墟既呢間"貴族旦糕"喇!

"A-溫"餅店既叫做"草莓大福,我以前都有評論過

係唔太好既評價,詳細請看舊文章:雪莓娘

對"A-溫"賣既我並唔欣賞,但對於呢間"貴族旦糕"所賣既就有正面評價

 

其實我好多年前只係食過一次,印象不差,價錢合理

早輪經過,就心痕又手痕買左一件,其實我係想知道事隔多年後

我由一個做雪莓娘既初哥變成老手時

唔知我對呢間餅店既雪莓娘會有咩新評價呢

 

"貴族旦糕"呢件係用芒果粒+士多啤梨碎做既

佢地唔係叫"雪莓娘",而好似係叫"日式果凍"

其實佢呢個組合同雪莓娘係差唔多,唔駛分咁多派別喇卦!

好喇,評分開始~

1號佳麗黎自"貴族旦糕"

 

 

 

跟住輪到2號佳麗

係我親手整既~靚靚哩!

 

 

 

3號佳麗係代表係黎自大阪(呢個以前响大阪買到既紅豆綠茶味)

 

 

 

外表就3件都係差唔多,但入面就大大不同喇!睇埋先~

 

1號佳麗

呢件係"貴族蛋糕"既~

 

 

除此之外,佢地d忌廉係用甜忌廉做既,的確係唔夠滑

仲有,糯米皮的末端切口位,雪左至少24小時後,硬左dd

 

下面呢個係我做既2號佳麗

一睇都知龍與鳳啦!

 

 

 

就算放响雪柜4日咁耐,仍然保持青春貌美唔會乾枯

當然啦,呢個係自家食譜,失敗後再研究,再研究出黎架喎!

並唔係一般"行貸"食譜啵!

 

再黎係3號既大阪佳麗代表....3號佳麗....

唔好意思,3號佳麗突然退出喎

(其實係當年响大阪就咁即買即食,所以無影到相,無得比較添!)

 

並唔係要自誇

只係當年曾經欣賞既野

响N年之後,自己都不斷進步中之時,原來不知不覺間都係成長緊

要求唔再同以前一樣,手高,眼都高埋

 

雖然我認為"貴族旦糕"呢件"日式果凍"的確係有改進既空間

但如果再睇埋佢既價錢,只係$10/件,咁我依然覺得係物有所值既

價錢唔係貴,就可以用另一把寬鬆d既尺黎評論