藍莓芝士餅

10幾年前,嗰陣好鐘意食芝士蛋糕

尤其係免焗嗰種芝士蛋糕,佢係我既"正印大婆"

可能因為我既第一個有睇頭既蛋糕

就係"檸檬芝士餅"

所以對佢特別有感情,話晒都係同甘共苦過,佢係"糟糠之cake"是也

嗰陣時又唔怕肥,又唔怕膩口

果然真係"青春可以令人變得無敵"

當時既"痴情"都痴情得好專一

同是芝士蛋糕,但要焗既芝士蛋糕就多謝晒唔好客氣,佢唔係我杯茶

因為佢真係相當肥,食一件都飽足一日咁耐,咪話唔驚!

 

跟住唔知由幾時開始,慢慢怕食芝士蛋糕

"糟糠之cake"都要棄

所有芝士做既蛋糕都怕怕地,總係覺得食親呢樣野

我係迫緊個胃加把勁工作咁,所以慢慢就連一啖都唔想食

可能係無左最大既本錢---青春+自以為係無敵既健康,所以都無勇氣再食

的確我發現後生女仔可以勁擦芝士蛋糕,而完全面不改容

(咁我都曾經"後生"過,都有過呢d不理後果既胡混歲月)

 

"糟糠之cake"都失寵喇,輪到慕絲蛋糕得寵添

佢做左"2奶",我貪佢輕怡d,無咁膩口,食完無咁罪過+內咎

同"2奶"既感情,絕對係細水長流式,雖然無火花,但勝在暗暗地欣賞佢

 

上年去日本旅行,响北海道食過當地又濃味又rich既芝士蛋糕

仲要係焗嗰隻芝士蛋糕

咁又突然覺得焗既芝士蛋糕都好好味呀!

係,佢真係好肥,不過淺嚐都未嚐不可喎!

"2奶"既地位開始不保,仲為"外遇"開始意亂情迷添!

(如果要見異思遷,真係有一千個藉口容許自己做既)

今次就係咁响北海道邂逅左呢個"外遇",不過佢未能成功入門做到"三姨太"

 

話晒自知自己"年事漸高",光明正大咁經常去搵"三姨太"既話

真係遲早入廠大修都似

所以今次都係繼續做"外遇"就算囉,牽腸掛肚之時,先見面囉!

 

呢幾日就係心掛掛喇,咁就搵佢出黎"疏乎"下啦!

 

是日,"外遇"著左件紫紅色外套,搽左藍莓味香水

內裡都仲係咁白淨滑溜,我鐘意呀!

不過我有少少嫌"外遇"唔夠結實,做下gym應該會好d!

友人~

我"外遇"呢件紫色外套咪就係你响"小岩井牧場"買俾我既手信囉!

諗唔到可以做d咩,唯有迫"外遇"着件啫喱外套

睇落真係怪怪地,呢d啫喱外衣應該襯"2 奶-慕思蛋糕"多d

不過食落口都ok喎,不至於要丟左件外套

 

而"外遇"真係"正"到人人都讚佢好味,都無人嫌佢唔夠幾實

果然係"肉地型"總好過"肌肉型",或者"骨感型"喎!

 

整左一個蛋糕,就blog左一篇up風,可能又係舊病復發喎!