芒果慕絲蛋糕(FOAM。風。瘋)

 

好味既野通常都係無咩益 (越快樂就越墜落嘛!)

芒果呢樣生果都一樣,越食得多,隨時就越折墜,皆因為會咁樣

 

 

雖則係咁講,但好似無咩聽人話憎食芒果

有既頂多都係:佢濕熱架,所以我唔敢食/唔食得....

係咁就真係有d可憐喇!陰功豬囉!

 

雖然我又不至於係"芒果粉絲"

但我都唔會否認芒果真係好好味

 

呢幾年我都一定會同芒果結緣,就係為左整蛋糕

如果唔係為左整蛋糕,我可以完全唔食芒果都得

我諗自己對芒果無心癮,係因為食既時候d芒果汁會流到一手都係

我覺得狼狽 所以先無為佢瘋狂

 

不過如果做蛋糕既話,咁就唔同講法喇

事實上芒果真係好香,好甜,顏色又好靚,好適合用黎做蛋糕

所以每年趁芒果當造時

我總會做一次芒果慕絲蛋糕,只此一次架咋!

 

雖然香港係一個福地,要咩有咩,咩都可以靠由外地入口

不過講到芒果,就真係只有呢個時間當造既"呂宋芒"係又好味,又抵食

(如果唔係當造既時間,咁去"許牛珊"食芒果甜品都好味,不過價錢就貴左d喇!)

今次買左幾個芒果,每個都只係$2,用3個就可以做到呢次既芒果慕絲蛋糕

盛惠6大元,真係抵到笑!

 

食芒果慕絲既口感當然同食生果唔同啦

而慕絲係應該做到 FOAM 既泡沫口感

即係好似噴上頭既mousse咁,好似一陣空氣,一陣風

咁先係(絕頂好味)慕絲蛋糕既泡沫口感,好味到可以叫人愛上佢

咁就真係好好味既慕絲蛋糕喇!

而我就覺得芒果特別夾呢種 FOAM既口感

計晒以上種種"唔做唔得,唔食唔得"既理由

咁都無藉口唔抽時間出黎迎接呢個當造緊既芒果季節

每年就只係得呢一次,如果錯過左就唔該明年請早喇!