2010年一個人日本之旅-DAY 5@大阪-嚇到3魂唔見7魄

9月9日(星期四),全日天晴 

從來安排日本既自由行都係會將行程分上,下集

上集係艱辛之旅,隨時要攀山涉水,穿洲過省,趕!趕!趕!

下集就會係尾站,唔會再拎住行李周圍搬

安安樂樂咁停响一個地方玩埋最後既日子 通常都會揀尾程停大阪

以防自己可以隨時心血來嘲,突然想觀光,咁關西都有好多地方可以揀

最重要係大阪多美食,仲要係平靚正,應有盡有!

 

呢次响大阪既第一晚係入住東橫inn 房租係免費

皆因東橫inn會員可以有"10送1"既優惠,呢一晚正正就係第11晚

其實呢個10送1既優惠係由會員自己決定幾時先用

當然最着數係等入住房租比較貴既東橫inn時先用


咁就會再慳到少少錢

而阪東橫inn既房租就係呢次旅程中最貴既 ,不過貴並唔代表一定係好

 

貴既原因~只係因為大家要攤分昂貴既地價,仲有職員既高薪水

 

呢間東橫inn設有房租平少少既"單人房A",就係响電梯旁邊既房間

如果多人出入,有可能會嘈少少 所以房租會平幾百yen

以前都响其他東橫inn住過"單人房A",就唔多覺得係嘈


其實只係在乎當時其他既租客係咪有公德心

今次既然係房租免費,咁當然唔會揀"單人房A",結果咁就係錯誤既第一步....

大概因為入住當晚接近11pm先check-in

再加上大阪市區既東橫inn入住率係比較高,所以我被獲分配既房間已經係尾房

 

其實東橫inn既走廊係相當光猛,住尾房都唔係問題

真正既問題係我間房對面既門口,正正就係走火玻璃大門,睇通晒出面

呢個情況令到人有d不安感

總係"型"住全晚流流長,出面條樓梯唔知會閃過幾多野,話晒出面完全係無陽氣

早知係咁就寧願住"單人房A"喇,至少隔離左右都係人,陽氣一定盛d

一個人出門,有時都真係會諗得多左d......

 

大城市寸金呎土,都唔好期望窗外有好景觀,入住既呢一層就正正對住行車天橋.....


可能唔係樓對樓都算係好風景囉!

 

一覺醒來食埋早餐就搬行李去民宿,响大阪餘下既日子就係入住民宿

已經係第5次响大阪入住既民宿

民宿人氣之王-リくん就係用呢個樣黎迎接我啤住我

皆因當時只係掛住同民宿太太寒暄,咁リくん就"焼気持ち"(吃醋)

民宿仲有一隻"白天寄居狗",佢係民宿太太女兒既狗

呢隻狗係咩品種?一睇都知佢比りくん醒目

不過再醒目都一樣搶奪唔到りくん响民宿既"大人氣寶座"

果然"傻"都係福氣黎架! d人就係鐘意福頭!

 

响民宿放低d行李之後就借左架單車出去逛

其實呢一次之前,計落已經有9年時間係完全無踩過單車

而以前都只係會响大尾篤既水塘大霸踩,所以技術絕對係"9流"

唔係親自响日本踩過單車都唔知驚嚇度係咁高既 

 

過馬路時即使係綠燈,d車仍然係會由左或者右邊轉埋黎

徒步過馬路就當然無問題啦,但一踩住架單車就完全係另一回事

雖然司機會先讓路人過馬路,但以我d"9流"既技術,真係唔多掂!

又從來都無試過踩單車時係人+單車爭路行

仲有d 颷單車人,"呼"一聲咁夾住我,响我身邊擦過

咁驚嚇度就要再 x 3倍,好大壓力呀! 

我唔想俾幾對眼睛睇住我仆(响)街喎!

 

9流既技術就連咁樣既小斜坡都踩唔到上去,要落地推車呀! 

不過呢度明明寫住"バイク通行禁止"架喎.....不過無乜人守規舉囉!

 

响行人路上有好多呢d柱,不過多數都係"渣"唔穩架單車

澎~澎~聲咁撞埋去,根本就係踩住架單車亂咁撞 

完全唔係"大丈夫" ( 日語漢字) 

 嚇到一額汗咁先去到呢個毛馬公園

其實呢次係為左明年既賞櫻而探路,賞櫻唔一定只係要去"賞櫻名所"


有時去d少人既地方都一樣有mood

靚風景一街都有,只係在乎當時人有無對美感既觸覺可以發現到

所以呢次就預先做定功課

 

黎到呢度見到呢個公園就好有親切感

响日劇入面成日都有呢d公園,通常學生放學都係會經過呢d公園

當日既天氣實在太好,所以評語只有一句~気持いい! 

可以咁樣短時間感受一下當地人既生活模式


其實都係幾寫意既事,至少唔會好似一般旅行咁,趕觀光,趕搭車 

自己趕自己鴨仔

呢份hea住既感覺絕對係奢侈(應該係多數人會認為係無聊)

踩埋架單車去購物,感受一下當地人既生活模式 

 呢間超市門外有超過100個單車位

為免瘋狂購物完畢後會唔記得邊架係民宿既單車,所以要幫佢影定張相

 

日本每個季節都有當造水果,巨峰提子係我既至愛

逛超級市場係每次必定既行程,超級enjoy! 

順便踩埋單車去"りくろーおじさんの店"買超好味既雞蛋布丁 

呢個係每次去大阪都必食既甜品  

我對佢既愛 已經超越左日本既蛋糕喇!

呢期仲有新商品-抹茶芝士蛋糕,當然要買黎試下 

唔.....麻麻地咋 


無乜驚喜,芝士蛋糕仍然係比唔上北海道既出品

雖然呢間舖頭既招牌芝士蛋糕係用北海道十勝既牛奶

但都仲係做唔到北海道style既芝士蛋糕

當然佢既價錢都無北海道出品既芝士蛋糕咁貴,一分錢,一分貨

 

哩架單車個籃咁"大"個,只係"小出血"已經塞滿左個籃,唔返歸唔得

跟住又係沿途喊驚咁踩住佢返民宿  


返到民宿門口就遇見民宿先生(正宗日本人)

佢好似認得我,就算唔係,佢都一定認得自己架單車,驚魂都未定就同佢"挨拶"


不過完全係語無論次,可能都嚇親佢架! 

民宿先生應該係會咁諗 : 做乜民宿租左俾個語無論次既傻婆呀?

真係俾架單車嚇到失常左一陣間

 

明年都係會咁樣踩單車响民宿附近賞櫻,所以會响香港秘密練功


將d"9流"既單車技術至少要練習到"3流"先出發