今週老婆要出牆

哩輪個個星期"捕"住最新一集嘅JIN仁

每個星期都只可以睇到一集,唔可以一氣呵成,咁實在係相當吊癮

邊個叫JIN仁真係好睇到"我願意等"

(唔經唔覺都已經 lun埋最新嘅第8集,怕且都好快可以寫埋 JIN仁完結篇嘅評論) 

所以哩期就係同一時間煲埋其他舊日劇

今週、妻が浮気します(中文譯名:今週老婆要出牆)

哩套戲並唔係特別好睇,悶場都有d,尤其係開頭四集

不過我又覺得幾值得睇

但相信會比較啱一d已婚人仕,又或者一d比較成熟嘅人去睇婚姻關係

婚外情?!隨時自己會變成劇中主角....

哩套戲都可以當作係預習,以一個旁觀者咁去睇夫婦如何處理婚外情

唯有作為旁觀者先會可以冷靜思考

總好過到事情真係發生時,嗰一刻都幾難可以冷靜

咁就好易會因為衝動唔理智而誤大事

 

哩套戲與其話係婚外情,不如話只係"出牆"會恰當d

因為女主角陶子第二次出牆,就已經俾佢老公當場踼竇

所以都無法再構成婚外情

而婚外情嘅男方又唔係打算同陶子好認真要發展落去

所以全套戲嘅落筆點係陶子同佢老公嘅婚姻會變成點樣?

兩個人點樣去處理婚姻走入低潮

 

男主角係堂々(中山裕介飾)

中山裕介確實係相當適合演哩個角色

佢個款都唔係d好能幹嘅男仕,所以哩d只係得把口嘅大男人

實際上係有d怕事又有d拖泥帶水嘅角色就好啱中山裕介去演

佢最初懷疑老婆出牆時,佢好似"電車男"入面嘅橋段咁樣,响討論區向人求救

不過都應該係佢條件比較平庸,所以唔會自視太高

當婚姻出現問題時都比較有轉彎嘅餘地

堂々嘅太太係陶子(石田百合子飾)

獨立自主又能幹,係好老婆,好媽媽嘅職場女性,堂々同陶子係大學時嘅同學

其實以陶子哩d咁能幹嘅女子又點會睇上戇直嘅堂々

但偏偏世事就係咁樣

 

响劇中,仲有其他角色嘅女子係鐘意過堂々

佢嘅吸引力就係黎自佢有一個很愛鍚太太很專一嘅形象

不過所謂愛鍚太太都只係堂々自己一廂情願咁認為嘅事

佢以為幫手送囝囝返學,幫手倒垃圾,咁就係分擔陶子嘅辛苦

哩d咁一廂情願嘅思維,响感情上係好多時都發生緊

將自己所認同嘅事強加於對方身上,仲以為自己做緊相當體貼嘅事

哩套戲都有唔少劇情足夠令觀眾作為警剔

 

陶子需要被愛,被關心,但堂々無發現哩件事

陶子又一直好忍耐咁扮演好太太 好媽媽,即使有不滿佢都無表達出黎

繼續兼任能幹員工,好太太,好媽媽,繼續忍受丈夫疏忽自己

結果不滿越黎越多,工作壓力,家庭壓力令佢透不過氣.....

 

某一日當陶子筋疲力盡之時,就遇到細心嘅男人

响自己老公以外嘅人身上搵到自己渴望得到嘅關心,即時着左迷....

(陶子嘅婚外情對象係一個比堂々優秀好多嘅男人)

其實婚姻之所以搞到咁,都只係兩個人溝通不足

即使有不滿都寧願啞忍,結果就走入死胡同中

堂々知道太太出牆之後,原先以為自己可以冷靜,因為仍然係愛陶子

佢以為自己為挽救婚姻而可以原諒太太,但結果佢都係失去理智 

仲一直逃避去知道陶子出牆嘅原因

即使陶子好想講,但堂々都係逃避唔想知道

睇到哩度又係有d令人忟憎,逃避唔可以解決問題喎!

太太都肯講,其實都係想有轉彎嘅餘地

 

陶子有出牆記錄,堂々都一樣有,而且陶子都知道

男人出牆就係天下容許嘅事,女人出牆就要受盡千夫所指.......真係有d唔公平

陶子出牆被揭發之後,最初兩個人嘅關係無好轉

因為兩個人都逞強,唔認為自己錯

堂々亦做左d又小家又無風度嘅事,令陶子更加嬲

 

不過堂々身邊有好嘅軍師為佢分析,又有好同事支持佢

咁佢先慢慢可以平心靜氣去處理哩次婚姻危機

 

劇中嘅兩個人的確係因為有愛情存在先會結婚

只係婚後溝通不足,先會搞到咁

其實只要佢地可以說服到自己再次接受對方,咁就可以重修舊好

雖然明知佢地兩個人會和好,因為大家都願意坦誠,所以關係更勝以前

但和好之前都經過一d心理上掙扎嘅路,皆因為戲要做夠11集先可以殺科嘛!

 

其實感情之所以會出現第三者,最簡單而直接嘅原因就係

自己老公/老婆响另一個人身上搵到自己所無嘅野

而偏偏哩樣野又係會吸引到自己老公/老婆,咁就好易意亂會情迷

有時經歷過風雨之後,而大家又可以恰當地處理,無令關係再惡化嘅話

咁人生路上一d絆腳石或者可以視為一d考驗

不過我相信哩個情況,只會出現响一d真心愛對方而確實有為對方設想嘅人

之所以會咁講,因為現代社會嘅現象,好多人愛自己多於愛枕邊人

之所以會結婚,都只係因為自己認為自己哩個係適婚時候

咁當時身邊嘅人係邊個,咁咪就順理成章咁同邊個結婚

又唔需要好愛對方,只需要唔討厭對方就可以

哩個只係緣份出現嘅次序

並唔係因為遇上相愛嘅人而想互相扶持,跟對方走以後嘅人生路

如果婚姻&人生嘅出發點係以自己為先

哩d婚姻往後嘅路都大有可能係危危乎

最重視嘅人係自己,咁就算係失去其他人,其實都唔會點樣在乎

自私(只重視自己)+盲目無知,哩個組合嘅結果係失敗嘅話,咁都係合理嘅事

不過哩d"愛得有幾深"嘅問題,對某d人黎講係深奧左d

 

如果確實係曾經互相重視咁真心相愛過,又曾經失去,先會珍惜能夠擁有

為左要繼續可以擁有,的確需要付出好多努力

所以我先會覺得哩套戲有佢嘅可觀性,雖然的確係有少少悶場

但佢散播嘅訊息係相當正面

 

每集完結前,都會有名人語錄,下面哩兩句係最令我有同感

 

男にとって愛は生活の一部だが

女にとって愛はその全部である

(愛情係男人生活中嘅一部份,但就係女人生活嘅全部)

       完全係同感以上哩句     

 

過去にこだわる者は,未来を失う

(忘不掉過去的人,得不到未來)