2014(秋季)單人匹馬闖日本之旅 DAY 1@ 香港-LIKE x 5

 

 

 

哩次白伽煎起行去東京，揀左價錢比較實惠嘅撻尾航空

 

以前哩間航空公司嘅風評麻麻

 

例如：行李過重無人情講，飛機餐唔好食，食物又凍，無電視睇.......

 

不過哩次白伽煎親身經歷過之後，即刻揾到LIKE佢嘅地方

 

不過哩次都應該係＂絕坐＂喇，想再番坐都無機會

 

撻尾航空停辦由香港飛東京嘅航線。。。

 

 

 

 

第一個 LIKE：

 

佢出發時間比起其他由香港飛東京嘅航空公司早

 

明明寫明係08:20出發，但CHECK-IN後，登機証上面寫住08:00拉閘

 

 

 

 

航班告示板上都寫明預計時間係08:00

 

 

 

 

 

早左20分鐘出發咁當然係好啦！

 

撻尾有早無遲，好大原因：佢係一班由香港飛美國，响東京轉機嘅航班

 

如果香港哩邊有延遲，都會影响到由東京去美國嘅乘客 

 

 

 

第二個 LIKE：

 

飛機餐都算合格，當然係比唔上＂屍激時＂，＂大和航空＂，＂全日燶＂啦

 

不過只要認同：一分錢一分貨，咁就無需要強行比較

 

 

 

第三個 LIKE：

 

座位有電視，電影嘅選擇相當多，而且空中嬸嬸／空中叔叔有香港人

(要支持無年紀歧視嘅企業)

 

機上廣播有三種完全純正流利嘅語言（英文，廣東話，日文）

 

 

 

第四個 LIKE：

 

乘客中，有唔少係鬼，大概佢地係轉機乘客

 

响哩個情況下代表：相同航班上入境日本嘅乘客係相對較少

 

所以哩次過海關做手續時，由排隊至辦妥手續嘅時間只係20分鐘左右

 

只要考慮到入境要排大隊哩個原因，白伽煎係唔會考慮坐＂屍激時＂去日本

首先係＂屍激時＂機票係最貴

 

二來怕左全機大部份香港人，怕會遇上無理港人乘客

 

（例如：當年成為一時佳話嘅飛機亞姐）

 

 

三來就係唔想全機香港乘客排晒大隊等做入境手續

俾最貴嘅機票，但要接受以上嘅可能性？

NO啦！唔該晒！

 

第五個 LIKE：

 

有流利雙語廣播嘅地勤人員，哩樣野係由成田返香港CHECK IN時先發現

 

白伽煎一向都係選擇坐大和企業嘅航空公司，响日本機場對於地勤人員嘅問話

 

只能係估估下

 

哩次坐撻尾，一行到柜位，個混血兒嘅地勤人員就問白伽煎：

 

ENGLISH? にほんご?

 

白伽煎當堂醒晒，哩次終於知道個地勤講乜，問乜喇！

 

 

 

仲有一個唔知算唔算要讚?

 

由香港飛東京嘅乘客，每人可以免費有一件寄艙行李＋一件手提行李

 

而兩件行李嘅重量都限制在23KG或以下，手提行李都有23KG?

 

不過其實其他航空公司都極少會要求乘客連手提行李都過磅

而以手提行李嘅容量，塞爆都難以有23KG，除非係帶磚頭或者足金金條上機

 

 

 

撻尾贏左咁多個LIKE，不過對白伽煎黎講，其中一個讚係要付出不尋常嘅代價

 

話說撻尾於08:20啟航，咁咪啫係好早＋很早＝好很早就要到機場CHECK IN

 

白伽煎住市區，要趕到早兩個鐘CHECK IN，咁只可以坐機場N巴士

 

另一選擇就係車票貴４倍嘅機場快線

 

咁最後決定當然都係以經濟為首選

 

 

 

話說出發當日，白伽煎預早好多去到機場N巴士車站等車，等左15分鐘

 

（哩個時間天仲未光）眼前一架機場巴士响巴士站最遠嘅快線呼一聲咁飈過

 

吓～飛站？？？咁點算呀？

哩班係最後一班機場N巴士喎！

 

哩個時間白伽煎已經意識到下一個選擇只有機場快線ONLY

 

就算車費貴４倍都係要俾，飛機唔等人，唔可能等下一班機場Ａ巴士

 

哩個時候，白伽煎腦海又出現四個字黑仔纏身

 

 

 

本來白伽煎諗住返到香港就投訴哩個＂情疤＂司機

 

不過返到香港之後就諗：花時間去投訴佢，最多咪只係換來幾句：

＂深感抱歉＂，＂希望未來本公司嘅服務可以令你滿意＂......哩啲咁嘅門面公關腔嘅說話

講左＝無講，聽左＝無聽

 

既然係咁就慳返，無謂仲要花時間去做無意義嘅事