2014 日本之旅 DAY 1@大阪- 首日甩轆記

 

2014年5月3日～星期六 (晚上)，大阪天氣
 

 

　

 

哩次旅行一到埗首日正正就係日本四連休嘅GOLDEN WEEK

 

酒店好早就訂房爆滿，又或者房租加價

 

 

去大阪咁多次，最初以為住梅田係最好，宜家反而覺得住難波比住梅田係更好

 

至少比較近機場，坐巴士又得，坐電車都得，仲唔需要轉車都直達機場

 

不過難波嘅東橫INN比較細，房間唔多，因為交通方便，房租當然係比較高

 

為荷包着想最後都係決定泊宿其他房租比較平嘅東橫

（其實係就算想住都無房，預訂房間好早就爆滿）

 

反正初到埗未開始血拼，行李都唔太重，就算之後要搬酒店都唔會太辛苦

行程尾聲時先轉去難波東橫INN


 

 

 

堺筋本町同谷町四丁目相距大約3分鐘路程，分別有兩間東橫INN

 

大阪船場東/谷四交义差点

官方網頁所示兩間都相當接近電車站，出左車站步行分別大約1至3分鐘

 

不過大阪船場東嘅房租比谷四交差点仲要平幾百日元，到底何解呢

理由係........　

 

 

 

 

房租平啲嘅原因就係上圖所示嘅行人天橋

 

出左堺筋本町車站，必需要上行人天橋先可以去到酒店

 

白伽煎就覺得日本嘅無障礙設施唔及香港咁普及

 

相片中嘅行人天橋出入口全部只有梯級而無斜坡

 

 

 

不過响日本見到坐輪椅嘅人又比香港少好多

 

 

 

本來白伽煎都諗住唔慳嗰幾百日元，住谷四交差点嗰間東橫INN

 

但係GOLDEN WEEK嘅關係，谷四交差点嗰間嘅禁煙單人房早已經訂房爆滿

 

咁就唯有第一晚住船場東嗰間

 

 

 

去酒店當然係要徒手抬起個行李喼上天橋

 

如果諗住血拼嘅人，就唔好慳嗰啲差價，寧願住間方便運送行李嘅酒店會好啲

 

或者可以參考白伽煎嘅做法：

 

行程去到尾聲，作最後衝次時，就搬去啲交通方便嘅酒店

 

哩次白伽煎最後一晚係泊宿响難波，就係因為難波有直車出機場，唔駛轉車

 

 

 

到埗哩晚，响酒店完成CHECK-IN後，就有各樣事情要做

 

首先係去LAWSON確認訂高速巴士車票

 

 

 

由2010年起，白伽煎响日本跨境自由行時，首選都係坐高速巴士

 

只因為車費比較經濟而且舒服啲

 

即使對機器患有白痴症嘅白伽煎對於响便利店操作以下嘅機器黎確認車票

 

已經係相當駕輕就熟，其實篤黎篤去襟掣都幾好玩架

 

 

 

當然可以選擇以信用咭响網上俾埋錢，不過萬一有咩退票或者更改

 

就可能做唔到網上/更改/退票/退錢

 

要致電巴士公司先可以更改咁白伽煎嘅日語程度又未去到咁流利

 

所以都係選擇到埗日本先俾錢 

 

 

關於訂高速巴士嘅詳情:

http://bagajin.blogspot.hk/2012/05/2012day-1_3.html


俾左車票錢之後就放心去食晚飯

哩晚白伽煎一早揀定要重遊舊食店，食最美味嘅いくら丼(大魚子丼)

最近食店嘅車站係長堀橋，只係堺筋本町下一個站，行路都只係大約20 分鐘

咁當然係行路啦！

沿途經過嘅係香港旅遊天書都會介紹嘅松屋町

專賣各式手辦模型，或者懷舊玩具嘅舖頭

不過哩日係GOODEN WEEK，又過左晚上8點，全條街想揾個路人睇下都唔易



因為係重遊舊食店，哩次已經係第3次光顧，白伽煎懶老定咁响條街行

行左大約15分鐘開始覺得唔對路即刻摷地圖出黎睇

（其實食店嘅位置好接近香港人選擇入住嘅富士屋酒店）

原來天黑左真係好易迷路，幾經轉折先揾返啱條街

不過仍然係揾黎揾去都見唔到間食店


以下係舊相片，以前白伽煎都係靠哩個廣告牌黎認住哩間食店




但今次來來回回3次都係揾唔到哩個廣告牌，點解呢？點算好呢？



係咪搬左？還是執左？

唔會呱咁好食嘅食店唔會無生意啫！


關於いくら丼，詳情請CLICK:

http://bagajin.blogspot.hk/2012/07/2012day-14.html


估唔到第一晚到埗就甩轆，迷信嘅白伽煎當堂有啲沮喪，好似有啲唔老黎咁樣

不過再沮喪都要先醫肚，時間都去到晚上9點，其實真係相當肚餓

中午上機後，只係食左一條朱古力頂肚餓咋！



食唔到好想食嘅大魚子丼，白伽煎即時轉移目標

雖然肚餓緊，但哩一刻要先搞掂甜品先

行返出心齋橋，下一個目標就係りくろーおじさん嘅布丁

營業時間只到晚上9點半，仲唔急急腳咩！



去到就見到以下嘅告示

。。。吓～搬左？！。。。。睇真啲先

哦～新舖只係相距舊舖80米咋，咁都好啲
 

 

 

 

新舖比舊舖闊落，仍然係貫徹始終咁响門口打晒蛇餅買日式芝士蛋糕

 

 

 

不過白伽煎從無為哩個芝士蛋糕動過心

唯一死心塌地，愛到地老天荒嘅從以前到宜家都只有＂雞蛋布丁＂

 

 

 

 

 

總算唔係諸事不順，買到布丁後就係準備晚飯，最後選擇响超市買晚餐

 

行超市，不論係香港還是日本，哩個都係白伽煎嘅嗜好

 

無法啦，因為咀刁而且為食，日本嘅超市又樣樣新奇

 

 

 

晚上9點，超市已經有好多減價食品促銷

 

以下就係白伽煎嘅＂是日晚餐＂，買返酒店食，返到酒店開餐時已經係晚上10點幾

 

晚餐差唔多變為宵夜

 

 

 

 

 

可樂餅係白伽煎嘅至愛之一，不過食嘅時候外皮已經淋左

 

哩個日清即食飯係白伽煎哩次都日本一心想有機會食嘅野

 

即食面就食得多仲係哩個新奇啲

 

 

 

 

其實香港都買到，不過價錢都相當貴，正價賣$36.9

 

所以決定去到日本先解開謎團，佢係咪咁好食？

 

 

 

 

 

哩個係辛口咖喱味，响酒店嘅公用微波爐搞掂佢

 

 

 

製成品嘅飯都相當黏，係咪好食就見人見致

 

白伽煎就覺得一般啦！

 

 

對於哩個甩轆的首日都唔再期望啲乜，叫做醫飽個肚就算

 

不過為美食而生存嘅白伽煎對於食係有一份堅持，好食在後頭

 

 

 

 

趕响收舖前點都要買到嘅りくろーおじさん布丁

 

買一個太少，如果唔係翌日要搬去隔離間谷四交差点東橫INN

 

白伽煎一定會再買多幾個放响酒店嘅雪柜，等自己幾時想食都可以

 

宜家哩兩個，一個係晚飯後嘅甜品，另一個係翌日早餐嘅甜品

 

早餐都能夠食到りくろーおじさん嘅布丁，實在係人生幸福嘅事

 

就算食完會肥死都～死也願意

 

 

 

 白伽煎為佢嘅厚身份量＋香滑而著迷

 

 

响超市仲買左一埋食物準備在途上好好品嚐

 

 

 

哩晚沖涼後可以休息已經係接近一點，實在係大折騰嘅首日

 

 

 

好好休息明天仲有各樣挑戰