相信係冥冥中嘅緣份令白加煎會睇哩套日劇
女主角: 戸田惠梨香,唔係白加煎欣賞嘅女優
男主角: 三蒲春馬更加係睇"14歲的媽媽"時,已經對佢無乜好感,純粹係角色婆媽唔討好
(三蒲春馬同玉山铁二可以飾演兩兄弟,佢兩個有d相似,一個係成熟版,另一個係嫰口版)
另一女主角:武井咲,面孔太新,更加唔識佢,不過佢個樣幾有氣質
另外,白加煎對校園題材從來都無乜大興趣
哩套戲收視只有10-12點,不過由頭尾都算相當穩定,無乜大起跌
咁都應該代表睇開嘅都繼續睇
白加煎第一次睇左開首30分鐘,放棄!
一個月後睇埋餘下嘅第一集,仲係想放棄唔再睇
因為劇情係以下咁樣
不過唔記得點解會繼續睇落去
睇到中段明白左每個角色內心嘅掙扎,仲有d心急想知劇情發展
男主角-修二跟女主角-夏實係未婚夫妻,婚禮籌備中
佢地都响一所私立高中教書,兩個都係受學生,家長歡迎嘅老師
其實佢地都係高中嘅同學,大學同學,拍拖結婚都係合理嘅事
(不過唔係學生時代已經係戀人身份,拍拖係後來嘅事)
响開學日之前一晚,修二因為酒意
而搭上一個妙齡少女-佐伯偏偏哩個就係自己新年度担任班主任嘅學生中其中一個
修二認出哩個學生曾經瞓响自己屋企張床,自知理虧,一直担心事情被揭發
但另一方面又要响學生面前繼續扮演為一個正直好老師
响未婚妻前又要裝作若無其事
夏實同修二嘅戀愛本來就係順理作章咁發展,風平浪靜咁拍拖,結婚
而原來佐伯早就因為某d原因而暗戀上修二
一次巧合改寫左三個人本來係相當無風浪嘅人生
又或者應該話三個人都因為哩件事而更加明白"愛是甚麼的一回事"
自己最愛是誰?最需要的人是誰?
夏實性格開朗
自信堅強;相反地,修二有d婆媽,性格柔弱,努力配會別人嘅期望兩個人相處,總係由夏實作為"開路先峰",而修二只係跟隨者
而且夏實嘅思想的確比修二理智成熟
佐伯因為自己有先天病,從來都相當自卑
一次同姐姐出門旅行遇上意外,近乎完美嘅姐姐身故,父母為此傷心不已
佐伯反覆認為"點解死去嘅唔係自己?反正自己只係一件次貨!"
佐伯本來只係暗戀修二,結果因為一次巧合而製造出一個誤會
對修二嘅感情突然產生佔有慾,對夏實產生妒忌心,誓要從中搞破壞
當夏實開始意識到佐伯親近自己係另有原因,而都估計到事情同修二有關
但係愛情令夏實對修二投信任票,直到佢知道佐怕同修二搭上後
性格開朗自信嘅夏實都崩潰,無法接受修二跟學生發生關係,夏實變得衝動無理
佢對自己哩個改變都難以置信
事情被揭發後,老師搭上學生,哩個係絕對唔容許嘅事
佐伯知道自己令修二惹來大麻煩
終於將事實公開,其實佢同修二無發生一夜情,赤裸嘅修二都只係醉酒而無借醉行兇
劇情黎到哩度本來可以結束,反正都真相大白
咁佐伯退出,夏實同修二可以繼續迎接婚禮
如果劇情只係咁表面膚淺,咁都唔需要花錢拍戲,白加煎都唔會評論一套爛劇
本來夏實都認為真相大白後,一切會還原基本步,婚禮繼續進行
不過佐伯嘅事就引起修二嘅關心,知道佐伯自卑嘅原因
修二更加認為自己身為老師,應該可以為學生而付出更多
夏實知道修二心中多左另一個女性,而哩個女性又暗戀修二
感情已變
夏實主動取消婚禮,修二繼續担任附和嘅角色修二未能搞清楚自己對佐伯嘅感情係乜,只知道自己在意佐伯,想支持佢
而因為懷疑"一夜情"事件,修二需要接受半年停職
偏偏哩個時候夏實發現自己有左修二嘅bb
劇情黎都哩度又係相當有理由還原基本步,夏實同修二因為bb而結婚
但係夏實決定做單親媽媽,懷孕一事無向修二說明
夏實明白自己並唔係找尋結婚對像,而係找尋真正愛情
因為懷孕而結婚,同因為有愛情,因為需要對方而結婚係兩回事
白加煎係相當欣賞哩點
白加煎鐘意哩套戲係因為劇中人對愛情有思考過
近日發現太多人以為結婚=找到真愛,對於一d思維只達某程度嘅人黎講
結婚就代表有真愛,甚至是最愛
白加煎對以上表面理論係"有真愛而結婚 ≠ 結婚就有真愛"
更多人甚至搞不清或者都唔需要搞清自己"情歸何處"
結婚哩個動作背後仲有幾多(只係自己單方面有需要嘅)附加動機
哩d問題對唔少人黎講都會覺得係"無嗰樣整嗰樣"
或者根本問題深奧得未夠程度去諗,總之煮到黎咪食,有問題先算!
所以白加煎實在鐘意夏實嘅理智,雖然佢好愛修二,亦有左修二嘅bb
大有理由可以成為修二嘅太太,搶回心中所愛
不過佢要求修二搞清楚自己嘅心意,而唔係因為責任而配合他人
當然最後都係完滿結局,而修二經歷左咁多事都終於成為一個活着唔係為配合別人
而係為真正自己嘅感受
白加煎認為感情膚淺無根並非好事,輕易得來嘅野都未必會珍惜
有時排除萬難而得到嘅結果可能先可以歷久常新,永遠珍惜
不過現今嘅人係怕困難亦都受唔起唔如意嘅人生
大家唔在意深度,只求Life is easy and happy
雖然套戲又唔可以話係好好,事實都有d情節係交待得比較馬虎
例如修二同屋企人嘅關係,不過整體黎講睇完都有令觀眾思考嘅地方
响討論區見到觀眾對哩套劇嘅評論只有兩極化
有人覺得相當無聊
有人相當推介,咁都表明左有d人嘅思維只達到某程度
佢地唔會深究到結婚同真愛會有乜分別:一定係有愛先會結婚架喎!
相反明白到哩回事嘅人,大概都唔會對哩套戲反感
沒有留言:
張貼留言