3月23日,香港天氣:熱
厚雲
白加煎哩次嘅日本之旅,去到日本之後就頭頭碰着黑
最初都唔信係咁邪,不過當接二連三發生唔順利嘅事
咁回想返轉頭,哩次旅行早在訂機票時,已經係幾番阻滯
(半)黑仔事件簿之
其實乜係(半)黑呢?......即係黑又黑唔晒,倒霉一輪之後,最後件事都會完成到
1 月上旬訂3月31號嘅機票,奈何臨近復活節假期旺季,所以航空公司吊高黎賣
遲遲都唔肯俾機位
一開始已經係唔老黎不過白加煎嘅心態係"急櫻" (註:唔係急婚)
即係一心要邂逅日本櫻花,一睹佢風采,所以就萬事強求,百般遷就都接受
不過响哩個旺季假期堅持要買package,航空公司係'睬你都傻",佢地立心吊高黎賣
當時話買package就要waiting list,但單獨買機票嘅話就即刻有位
$4700嘅21日機票 vs $4640嘅17日機票+2晚酒店
咁擺明佢地要利字當頭,肯俾錢就有機位响3月31號出發
白加煎係一個窮鬼
咁唯有提早一個星期出發,咁先有機位其實提早一個星期出發,怕凍嘅白加煎係相當唔願意,3月嘅日本仲會出現幾度低溫
奈何"急櫻"心態,唯有扭曲自己嘅意願去遷就........
幫襯全日吉買$4640嘅package,已經係由7日延長到17日有效期機票
仲可以選擇一程內陸機(費用已包括响延長機票嘅費用中)
本來白加煎打算哩次行程由大阪坐內陸機去四國嘅松山開始
不過响旅遊旺季,延長機票附加費只為延長機票而用
所以唔包括行程中已有一程內陸機嘅機票
雖然web-site中無咁講,不過佢有權唔賣機位俾乘客,所以無寫明唔代表就係"無"
航空公司擺明要賺到盡,咁松山行程唯有取消
雖然萬事遷就之下,機票終於到手,但原來'黑氣"在後頭........
再次証明勉強無幸福,萬事遷就都無用,急係唔會有好結果,所以旅程中諸事不順
N年前,白加煎同朋友跟團去某個地方,旅行社代辦簽証
結果個簽証唔係哩樣文件唔齊,就係其他野,搞黎搞去都搞唔到
因為咁樣大家都覺得唔老黎,嗰次到最後係另揀地方
其實白加煎今次嘅情況都係差唔多,不過為左"急櫻",全個人就盲左一樣,乜都睇唔到,結果.......
唔好話迷信,總之今次就係由頭(半)黑到尾段返到香港(都仲黑緊)
(半)黑仔事件簿之
大半年來日元高企响$10甚至以上,從來都無LUCK嘅白加煎自知自己唔會咁好彩
輪到自己出發前d日元會跌
所以响出發前一個月已經逐d 錢咁唱左
不過當唱左一半錢嘅翌日,日元匯價就俾日本政府強硬干預
之後隨即响一個月內由100yen=HK$10,而變為100yen=HK$9.3X
係咪擺明玩我呢?
唔係唔俾佢跌,但可唔可以唔係白加煎一唱左錢嘅翌日,佢就隨即跌呢?
(半)黑仔事件簿之
出發當日雖然係搭下午航班,但中午時間已經要到機場辦登機手續
當日仲要去銀行將戶口入面餘下嗰少少日元都攞埋出黎
點知去到銀行排隊時先發現唔記得帶銀行提款咭,咁點攞錢呢?
因為已經準備出門,銀包入面無需要帶去日本嘅野,全部都執晒出黎,包括銀行提款咭
咁唯有急急腳趕返屋企攞
(半)黑仔事件簿之
响屋企相當急趕咁食左個簡單午餐,咁就拿拿林推行李去搭機場A巴士
响哩d黑仔劇情之下,當然唔少得要送車尾哩d橋段
咁又無端端要等多20分鐘先有下一班機場巴士
(如果再搭遲一班機場A巴士,咁就應該係離飛機起飛前唔夠60分鐘,都算黑又黑唔晒!)
終於都帶住一身霉氣上路,只係當時仲未有哩個醒覺
去到機場又順利出發,@香港嘅(半)黑仔事件簿就告一段落
不過黑仔事件未完,17日後返到香港再黑仔過
沒有留言:
張貼留言