2014(秋季)單人匹馬闖日本之旅 DAY 3@八戶 - 大雨殺到正之點算好?

2014年10月6日～星期一，八戶天氣（持續落雨）

一覺醒來打開窗簾一睇係哩個景象，當堂沮喪到爆燈





天氣預報仲講緊１８號颱風嘅雨帶要中午先打到黎青森，但佢咪已經提早左囉！

白伽煎沮喪到攤响床上諗緊點算，仲埋怨緊自己明知有颱風打到

為乜唔一早諗定第二個OPTION?

就係哩一想驚醒夢中人

行程本來係一朝早先到十和田嘅奧入瀨溪流，當晚泊宿温泉酒店，翌日去八戶

白伽煎响度諗：可唔可以先去左八戶，下午入十和田，照舊泊宿温泉酒店

翌日先去奧入瀨溪流

能夠有一線生機，白伽煎當堂彈起身梳洗

嗱嗱林走去酒店大堂上網睇各樣交通嘅時間表係咪可以接駁得上

搞左一大輪終於都可以將個行程大倒轉

哩次白伽煎點都要俾自己幾個讚

能夠即場執生，完全係以往累積返黎嘅經驗，所以無需要聽又由命，望天打卦

突然改行程所以要把握時間，哩朝坐頭班巴士去八戶センター開餐

所以又係連酒店早餐都唔吼，空住個肚去等食好野

嗱嗱林攞住行李CHECK OUT，其實酒店近車站

可以將行李寄存酒店回程先攞返都可以

但白伽煎又係自知黑仔，都唔知自己會坐幾點巴士由八戶センター返車站

又唔知到時天氣會唔會更大雨，到時撲來撲去又濕晒身就仲無謂

所以唔慳嗰幾百日元用車站COIN IN LOCKER

車站有各種COIN IN LOCKER，一般收費３００日元

不過精明嘅白伽煎就睇到時間料金制哩幾個字，乜野一回事呢？

首４小時收200日元，以後６小時多收100

哩個咁大彈性正合白伽煎使用，反正中午12:40已經要上巴士去十和田

所以一定只係要俾200日元

朝早颱風嘅雨帶仲未咁近，所以雨都唔算大

八戶駅嘅白天模樣

坐４號巴士去八戶センター

車程大約１１分鐘，只係１００日元

巴士冒住雨駛到

八戶センター係一個市場，有食堂，而白伽煎哩次鎖定嘅就係七厘村

哩度係一個室內ＢＢＱ場地

大人收費３００日元，可租用ＢＢＱ用具／餐具／調味料（不包括食物）

租用時間限２小時

哩日係星期一又係落雨天，所以人客都＞＞＞無，當時只有白伽煎一個

俾左錢先去買餸

花多眼亂，所以有啲舖頭就備有ＳＥＴ出售，完全適合人少少黎開餐

最後白伽煎揀左哩一盤，盛惠１５００日元

店員即時開邊及清洗

洗完白白之後幾咁誘人，帶子相當大隻

其實白伽煎响香港都無乜興趣去室外或室內ＢＢＱ

所以一時間都唔知點樣搞哩堆海鮮？

到底要ＢＢＱ幾耐先熟呢？

隔離有４個食客，白伽煎禁不住要向佢地偷師

第一款入口嘅係帶子，燒好後可以沾醬油或者鹽

白伽煎揀左最能保存食物真味嘅鹽去調味

不出所料，完全係食出食物本身嘅味道

上次嘅青森食海鮮丼，帶子刺身嘅清淡比唔上其他濃味海鮮刺身咁出眾

但哩次ＢＢＱ加鹽，令佢終於都吐氣揚眉喇！

其他都比唔上帶子嘅味道同口感，熟蝦又略嫌普通左啲，無驚喜

食完一盤未滿足，而且租用時間仲有大把

咁當然係再出巡睇下有乜好燒？

除左ＢＢＱ，仲有哩啲即食嘅海鮮，哩個係立食ＣＯＲＮＥＲ

最後買左６隻細蟹去ＢＢＱ，哩次有排燒

蟹太細隻係唔及大蟹鮮味，而哩６隻蟹只係食蟹蓋都搞左好多時間

又要睇住燒，又要食，所以難免燒燶左部份

食到尾段都後勁不繼，唔係飽到食唔落，而係拆蟹令人覺得太累

終於都有多啲客人捧場喇！

因為只帶左件（真正）手提行李，所以完全無打算要買手信

哩度啲野同青森市場又差唔多＞無新意

唔想攞黎辛苦，無意慾買野之下，响市場逛多一陣就上巴士返八戶駅