純愛日劇: 流星

 

    

竹野內豐係白加煎鐘意嘅日本男優其中之一個 

(另一個係江口洋介,宜家佢兩個都相當man+有型) 

 

模特兒出身嘅竹野內豐,型爆,cool爆,不過哩份cool有時會局限左演戲 

如果話竹野內豐木訥,內歛係相當貼切,有時覺得佢做戲似一舊"木" 

就係木口木面,木無表情,尤其係年紀大左,個樣仲man左之後就嚴肅左 

要佢做beach boy嗰d角色,相信都已經唔得 



哩次終於搵到一個為佢度身訂造嘅角色,劇中唔需要笑,"木獨"就啱晒 

劇中佢飾演要保護妹妹嘅哥哥 

套戲拍得靚,主題曲,配樂又做得相當好 


所以哩套戲成為白加煎最愛嘅日劇,仲係TOP 1添中晒毒 

 


唔只愛上竹野內豐嘅角色,劇中上戶彩都超讚  

只要佢唔係做巴渣妹,白加煎都鐘意佢d戲 

"流星"劇情雖然老套,不過只要用心去拍就可以化腐朽為神奇 

 


35歲嘅健吾有個高中3年級嘅細妹-瑪利亞,有個拍拖3年準備結婚嘅未婚妻-美奈子 

瑪利亞突然肝臟惡化需要移殖,家族人當中無人適合/願意成為捐贈者 

唯有美奈子血型跟瑪利亞相同,有可能成為捐贈者 

只不過美奈子無哩個勇氣為瑪利亞而付出 

突然間愧對健吾,唔願意成為捐贈者之時,同時都向健吾提出取消婚事 

白加煎响度諗:如果係自己,咁會點揀呢?  


 


如果唔係因為結婚前發生哩件事,而係响美奈子同健吾婚後一段時間先發生移植一事 

可能美奈子會有勇氣成為捐贈者,哩d就係命運? 


 


健吾着緊瑪利亞嘅事多於自己同美奈子嘅婚事 

毫無頭緒如何搵到捐贈者之時,佢遇上準備自殺嘅梨沙,救左梨沙一命 

知道梨沙有一筆3百萬日元嘅欠債,就响哩個情況下,二人交易成功,以假結婚作為合法捐贈者


 

24歲嘅梨沙有個相依為命嘅哥哥(修一),不過哩個哥哥只會連累梨沙 

四處騙財欠債,梨沙一次又一次幫佢還債 

 



以下哩幕係相當有趣,健吾安排要坦白話俾瑪利亞知道,因為移植一事佢同梨沙假結婚 

所以瑪利亞由醫院回家外宿一晚,健吾本來叫梨沙去別處暫宿 

不過半路中途見到梨沙俾哥哥纏住,健吾看不過眼 








哩個"假老公"對"假老婆"都可以咁肉緊,難怪梨沙會漸漸鐘意佢



健吾以保護別人為自己嘅責任,結果又係叫梨沙一齊返屋企 

突然間就變為以下嘅場面:左右為難 

兩個佢想保護嘅女人同場,而固執嘅瑪利亞接受唔到哥哥為自己嘅病而假結婚 

  

瑪利亞接受唔到自己連累哥哥,結果由醫院偷走,健吾同梨沙一齊去搵佢 

好鐘意哩一幕,兩個年紀有距離嘅人可以講心事

健吾同梨沙開始互相了解而信任對方,尤其健吾係一個大男人

 

實在好鐘意健吾一個完全唔會自高自傲嘅人,別人眼中佢係好哥哥 

但佢認為自己愛鍚瑪利亞只因一份虧欠 

到底有幾多人會愛鍚別人而又不計回報呢? 

健吾唔單只係一個好哥哥,仲係一個有膞頭嘅好男人 


相當深刻嘅一幕飾演瑪利亞嘅北乃紀伊响劇中都演得相當好 

 


梨沙看不過眼瑪利亞嘅任性,上前大鬧瑪利亞....... 

健吾又再一次為哩兩個女子而左右為難 

 


最後都係要媽媽出馬先可以平息一團糟嘅亂局 

哥哥鍚細妹出於一份守護,不過女兒心事都唯有媽媽嘅溫柔先可以化解 

哩家人嘅感情令人動容 


 


梨沙見到哩家人嘅親情深受感動  

 


終於決心要為救瑪利亞而唔係單純為金錢利益  

 



對於將肝臟移植俾瑪利亞,梨沙一直都表現出堅強勇敢 

 

梨沙嘅性格同背景,漸漸令健吾在意佢,不過瑪利亞嘅病情尚未有好轉 

健吾依然只係擔心瑪利亞 



健吾同修一,兩個作為哥哥身份嘅大男人,响度批評對方嘅不是 

 


手術前一晚,梨沙忐忑不安,拉高衣服叫健吾記住佢個肚 

哩一幕又係相當深刻,梨沙好似叫健吾負責任咁樣 

 


健吾係一個為家人乜責任都甘願揹上身嘅男人 

响佢心面已經願意揹起哩個責任,用自己嘅能力去保護另一個人 

瑪利亞病情好轉,劇情都要轉移返健吾同梨沙嘅感情上 

 


健吾教梨沙踩單車哩一幕係相當溫馨,無綿綿情話,細膩感覺由觀眾去意會 

(竹野內豐稱哩一幕係佢演藝生涯中相當有代表性嘅一幕) 





健吾放下木訥,終於向梨沙表白要保護埋佢 

 

一個無血緣關係,但就有愛存在嘅人 

白加煎响度諗:其實做健吾嘅妹妹好d,還是做情人(甚至太太)會好d呢? 

到底當男人同女人講:"我唔想讓你受苦",又或係:"我愛你",邊句會令女人感動d呢? 

 


健吾嘅媽媽係一個相當溫柔善良嘅媽媽 

梨沙用自己嘅肝臟而換來哩家人嘅愛+關心,都係因為梨沙對生命有勇氣而換來嘅幸福 

 






健吾同梨沙嘅愛情當然都並唔順利,因為梨沙嘅哥哥(修一)從中搞事 

有膞頭嘅男人就總係會將所有事情都一人攬上身

最後兩個人就係有哩份隔膜而要分開,之後先再重遇

 

寫完全文先發覺無讚過健吾係優しい,因為佢對人嘅溫柔體貼係用行動而唔係掛响口邊

相信要一個咁木訥內歛嘅人將甜言蜜語掛响口邊,哩個表現就會有d奇怪

健吾都優しい,不過係骨子裡表現出黎,大男人就會係咁樣

中文官方網頁: http://japan.videoland.com.tw/channel/1106a/default_002.asp


竹野內豐的訪問: http://dorama.info/esc/esc_link.php?lk=113&num=4703&gk=99&lkid=18955


 
  


  

實在係迷上左健吾,一個有膊頭,甘願揹起去保護別人嘅角色 

哩種男人响現今世代裡已經瀕臨絕種中,由各式"窩囊癈"黎取代 
  

有人話愛情需要有跳火圈嘅勇氣,健吾同梨沙各自對生命都有勇氣 

咁嘅組合先可以同步一齊經歷人生種種意想不到嘅風浪 

 

 

  

 


  

第1 & 2集(英文字幕) 


1-1 http://www.youtube.com/watch?v=fwPmcWcBRsk&feature=related 

1-2 http://www.youtube.com/watch?v=_pa94RyeXUg&feature=relmfu 

1-3 http://www.youtube.com/watch?v=AATFFtcQHJ0&feature=relmfu 

2-1 http://www.youtube.com/watch?v=6_ngE9Fzs7g&feature=related 

2-2 http://www.youtube.com/watch?v=dExKfaBEv4w&feature=relmfu 

2-3 http://www.youtube.com/watch?v=NzV2i0SxCyc&feature=relmfu 

2-4 http://www.youtube.com/watch?v=PABzGWn-rqw&feature=relmfu