百彈齋主都推介

 

文章日期：04/15/2011 11:33 pm

對於做甜品都有d心得嘅我,隨住經驗增多

咁就由唔止識得做,慢慢都變為識得去品評

好嘅當然要讚,唔好嘅就一定係彈,但係香港餅店嘅水準就多數都係彈

彈得多,失望得多,就寧願留返去日本旅行時先放肆咁食甜品

選擇只向高質素嘅甜品埋手,食肥左都叫做肥得心甘命底d嘛!

所以香港餅店想賺我嘅錢都真係要過五關,斬六將先得

 

撇除天氣潮濕之外,春天確實都係一個好季節

而士多啤梨

嘅當造期係冬天至初春,响哩個春天就食左一件"正"野

連我哩個百彈齋主都讚

咁真係好難得架喇!

所以都要响度推介一下,扮下食家

 

哩件係尖沙咀"鍋撈加蛋"酒店餅房嘅出品

佢地同款嘅水果批都可以讚,已經食過兩次哩款水果批,兩次都保持水準

第一次食嘅水果批全個清一色都係用Rasberry舖面

帶有酸味嘅rasberry,食完都唔覺得滯,內餡入面嘅custard做得好滑,甜味啱啱好

恰如其份咁担任"綠葉"嘅角色,custard嘅甜味都化解左Rasberry嘅酸味

絕讚!當然又新鮮又脆嘅餅底都係好味道

今年嘅當造嘅士多啤梨季節已經去到尾聲,但間中都仲可以食到

早輪第二次食哩間酒店嘅水果批

主角就變為絕對甜嘅士多啤梨,再加少少rasberry & blueberry

就係下圖相片中嘅哩個

哩次嘅配搭都一樣係讚

因為士多啤梨夠甜

哩間酒店嘅餅房响香港已經算係有d名氣

不過都唔係每款蛋糕都讚得落

佢地d 焗cheese cake就真係既無新意,而且仲食到又飽又滯

買過一次New York Cheesecake,結果係劣評如潮,食唔晒仲丟左入垃圾筒

 

日本嘅士多啤梨

當然係出名甜,韓國嘅都唔一定差過日本出品

第一次食韓國嘅士多啤梨係10年前响韓國旅行時食嘅

嗰時都無引入黎香港賣,不過哩幾年香港都可以買到喇

價錢比日本士多啤梨仲經濟d,品質又未必差過日本貨

 

其實我試過幾次响日本食當造士多啤,甜度都只係一般咋

好彩係响日本食,如果响香港買嘅話,就一定會呻笨,又貴又唔係咁甜

所以宜家如果响香港買,我反而會選擇真正韓國入口嘅士多啤梨

唔好買錯d雖然係韓國品種,但就係由大陸種植嘅士多啤梨

一分錢,一分貨,唔貪平就包唔會中計

 

 

士多啤梨

季節過去,跟住緊貼而黎嘅就係呂宋芒果

哩段時間食就真係價錢又抵,又好味

香港哩間平民餅店哩幾年成日搞新意思

哩期就輪到呂宋芒果做主角,仲係有限期出售,只係賣到5月4日為止

一直對哩間餅店都唔算特別情有獨鍾,當然佢地都偶有佳作

只係如果要响增加脂肪同謝絕脂肪哩兩件事之中作取捨,咁我就會選擇後者

咁即係佢仲未能令到"我為佢瘋狂"囉!

不過哩次嘅呂宋芒果蛋糕就發生左d特異功能喇!

 

第一次响餅店見到佢個真身,連忌廉都係米色,咁即係芒果味嘅忌廉啦!

嘩~有新意喎,我即刻好有興趣,好想食呀!

其實我更加有興趣食完之後就研究哩個芒果忌廉係點做出黎嘅

終於都買左黎食,一齊食嘅其他人都係一致好評

其實呂宋芒果本身已經係好討人歡喜嘅時令生果

(印象中從無聽過有人係話自己憎食芒果嘅....)

雖然我唔會評價哩個蛋糕係超好味(因為我仲係用日本蛋糕黎同佢比較)

不過全個蛋糕都配合很好好,所以都要讚

但如果分開每個層次,逐個部份黎品評,咁就會食到每個層次都唔夠深度

即係有d行貨,唔同日本蛋糕嘅精緻認真同講究

 

日本蛋糕响味道,口感,賣相都食得出師傅們有深度嘅追求

只係睇佢地d食譜書,做一款mousse又用到30%+45%脂肪成份嘅忌廉

一般業餘整餅人/日本師奶都唔會有咁講究

哩d就係我所講嘅日本蛋糕有深度

而哩次哩個土炮呂宋芒果雪芳蛋糕就係咁樣無乜深度

至少以我哩個業餘整餅人都可以做到哩個蛋糕嘅某d部份

例如:雪芳蛋糕層,脆脆朱古力餅底,無芒果味嘅天使忌廉....

 

一向我對一般餅店出售嘅芒果味mousse/布丁都會幾猶豫

因為好多餅店都會用d有添加嘅市售芒果汁/芒果醬,甚至係芒果啫喱粉黎做

當然咁做出黎係會有更濃嘅味道+顏色

不過芒果哩樣生果,要用添加劑黎做嘅話,咁一定食得出味道係假

雖然我對日本蛋糕嘅評價係好高,不過都曾經响日本食過最難食嘅蛋糕

嗰件正正就係芒果mousse cake,又正正就係食到假味,仲甜到難以置信

....難以置信新鮮生果可以有咁甜,咁咪即係假囉!

請看下圖,哩件係食過最難入口嘅日本蛋糕

 

芒果本身已經係好濃味嘅生果,無需要搞d咩花樣,加d假野

就咁保留芒果本身嘅獨有味道已經夠令人為佢傾心

即係等於一個美女,即使素顏都唔會醜得去邊

咁就無需要刻意化個濃粧,過晒火嘅話隨時只係越搞越衰

 

哩次哩間香港餅店就做到保留芒果嘅天然味道

至少我食唔到有添加假野,咁已經要讚

 

當然唔少得要提及嗰d米色嘅芒果味忌廉

佢嘅正身係"天使忌廉",只係哩個就加左芒果味

哩間餅店獨有嘅"天使忌廉"係比一般忌廉厚身,而且滑

當然係做左d手腳先可以由普通忌廉變為"天使忌廉"

哩個芒果味唔算好濃,但都配合得好好

坊間d餅店為左保留芒果嘅濃味而寧願加入添加劑,其實咁係多此一舉

就咁食一個芒果,同將芒果+奶+忌廉...變為一道甜品

咁味道上一定會係改變左,哩個係鐵一般嘅事實

 

如果要想盡量保存芒果嘅味道,唯有加多d芒果果蓉,甚至連芒果肉一齊食

如下圖哩個由我親手做嘅芒果批咁樣舖晒面都係芒果肉

咁就一定啖啖都保留到芒果嘅味道同口感

而唔係用添加劑甚至啫喱粉黎增加芒果味

不過好多餅店為追求濃味,又想減低成本就寧願用添加劑,甚至係啫喱粉

所以一直以來响香港(甚至上次响日本)食到嘅芒果甜品都唔可以稱為好食

而今次哩間"美x"餅店就盡量保留芒果嘅天然味道,所以哩次絕對要讚佢

寫完哩篇"食評"先發現原來我都有料過電視台嘅"尾姐"嘅

至少我無品評以上嘅芒果蛋糕有芒果味,士多啤梨批有士多啤梨味....